Բերբոքը քննադատել է Ադրբեջանում մարդու իրավունքների խախտումները

Գերմանիայի արտաքին գործերի նախարար Անալենա Բերբոքը, ելույթ ունենալով Բաքվում COP29-ը համաժողովում, հայտարարել է, որ Ադրբեջանում մարդու իրավունքների հետ կապված իրավիճակը մտահոգիչ է, գրում է Deutsche Welle-ն։

Նա ընդգծել է կլիմայի փոփոխության վերաբերյալ համաժողովի կարևորությունը՝ անդրադառնալով նաև մարդու իրավունքների իրավիճակին: Նրա խոսքով՝ լրատվամիջոցներում աշխատող ակտիվիստների և ընդդիմության ներկայացուցիչների ձերբակալությունը խիստ մտահոգիչ է։

Նշվում է, որ որպես օրինակ՝ նա հատուկ նշել է տնային կալանքի տակ գտնվող իշխանության քննադատ Գուբադ Իբադօղլուի նկատմամբ ելքի արգելքը։ 2023 թվականին նա ձերբակալվել էր Ադրբեջանում՝ խարդախության մեղադրանքով։

Բերբոքը նաև բացարձակապես անընդունելի է համարել Եվրոպայի խորհրդի խորհրդարանական վեհաժողովի 76 պատգամավորների Ադրբեջան մուտքի արգելքը։ Նախարարի խոսքով՝ դրանք ազդում են նաև Բունդեսթագի գերմանացի ներկայացուցիչների վրա և անհամատեղելի են ԵԽ-ում Ադրբեջանի ստանձնած պարտավորությունների հետ։

Հրատարակությունը նշում է, որ Գերմանիայի ԱԳՆ ղեկավարը միաժամանակ նշել է, որ գագաթնաժողովը պետք է արդյունքներ բերի կլիմայական ճգնաժամի դեմ պայքարում, որը նա անվանել է մեր ժամանակի անվտանգության քաղաքականության ամենամեծ խնդիրը։

Նոյեմբերի 13-ին Ֆրանսիայի շրջակա միջավայրի նախարարը չեղարկել էր իր մասնակցությունը Բաքվում կայանալիք COP29-ը գագաթնաժողովին։ Նոյեմբերի 20-ին Փարիզում Ադրբեջանի դեսպանը կանչվել էր Ֆրանսիայի ԱԳՆ՝ համաժողովի ընթացքում Ադրբեջանի նախագահի հայտարարությունների պատճառով։

Armenia Today