Իրանը նոր ցենտրիֆուգներ կգործարկի ի պատասխան ՄԱԳԱՏԷ-ի հակաիրանական բանաձևի
Իրանի ատոմային Էներգիայի կազմակերպության ղեկավար Մոհամմադ Էսլամին կարգադրել է արդյունավետ միջոցներ ձեռնարկել, այդ թվում՝ զգալի քանակությամբ նոր ցենտրիֆուգներ գործարկել՝ նախօրեին ՄԱԳԱՏԷ-ի Կառավարիչների խորհրդի կողմից հակաիրանական բանաձևի ընդունմանն ի պատասխան: Այս մասին ասվում է Իրանի ԱԳՆ հայտարարության մեջ։
Արտասահմանյան ԶԼՄ-ները նախօրեին հայտնել էին, որ ՄԱԳԱՏԷ-ի Կառավարիչների խորհուրդը բանաձև է ընդունել՝ քննադատելով Իրանին «միջուկային խնդրի շուրջ համագործակցության բացակայության» համար: Մեծ Բրիտանիայի, Ֆրանսիայի, Գերմանիայի և ԱՄՆ-ի ներկայացրած տեքստը հավանության է արժանացել 35 երկրներից 19-ի կողմից: Ռուսաստանը, Չինաստանը և Բուրկինա Ֆասոն դեմ են քվեարկել, իսկ 12 երկիր ձեռնպահ է մնացել: Նշվում էր, որ բանաձևը ՄԱԳԱՏԷ-ից պահանջում է Իրանի վերաբերյալ «համապարփակ» զեկույց պատրաստել մինչև 2025 թվականի գարուն։
ԱԳՆ հայտարարության մեջ նշվում է, որ Իրանի իրավասու մարմիններն ավելի վաղ տարբեր մակարդակներով հայտարարել էին, որ Թեհրանը կպատասխանի երկրի դեմ ցանկացած հակաքայլի ընդունմանը: Իրանի հնարավոր պատասխանի բնույթն ավելի վաղ հաղորդվել էր ՄԱԳԱՏԷ-ի գլխավոր տնօրենին:
«Դրա հիման վրա Իրանի ատոմային էներգիայի կազմակերպության ղեկավարը կարգադրել է արդյունավետ միջոցներ ձեռնարկել, այդ թվում՝ տարբեր տեսակի նոր առաջադեմ ցենտրիֆուգների զգալի քանակ գործարկել»,-ասված է Իրանի ԱԳՆ պաշտոնական Telegram-ալիքում հրապարակված հայտարարության մեջ:
Ավելի վաղ Իրանի ԱԳ նախարար Աբբաս Արաղչին հայտարարել էր, որ իրանական կողմը վճռական պատասխան միջոցներ կձեռնարկի, եթե ՄԱԳԱՏԷ-ն ապակառուցողական որոշում կայացնի՝ բանաձև ընդունելով Թեհրանի և նրա միջուկային ծրագրի դեմ:
Sputnik Արմենիա