Մոլդովայում 60 օրով արտակարգ դրություն է հայտարարվել
Մոլդովայի խորհրդարանը աջակցել է երկրում 60 օրով արտակարգ դրություն հայտարարելուն էներգետիկայի ոլորտում, որոշումն ուժի մեջ կմտնի դեկտեմբերի 16-ից։
Այս մասին գրում է «Reuters»-ը։
Խորհրդարանը որոշել է ազգային արտակարգ դրություն սահմանել այն բանից հետո, երբ հայտնի է դարձել ռուսական գազի մատակարարման ընդհատման սպառնալիքի մասին։
Արտակարգ դրություն հայտարարելը կառավարությանը թույլ է տալիս արագ արձագանքել և սահմանափակել էներգակիրների արտահանումը։
Արտակարգ դրության հայտարարմանն աջակցել է 101 պատգամավորից 56-ը:
Մոլդովայի վարչապետ Դորին Ռեչանի խոսքով՝ դա Մոսկվայից գազային շանտաժին վերջ տալու քվեարկություն էր։
«Ռուսաստանի նախագահ Վլադիմիր Պուտինը ցանկանում է Մերձդնեստրի բնակիչներին թողնել առանց գազի և էլեկտրաէներգիայի և պատանդ վերցնել նրանց։ Մոսկվան դա անում է Մոլդովայում իրավիճակն ապակայունացնելու համար»,- ասել է Դորին Ռեչանը։
Մոլդովայի կառավարության ղեկավարի խոսքով, ինքնահռչակ Մերձդնեստր գազ չմատակարարելը կհանգեցնի հումանիտար ճգնաժամի, ինչպես նաև ռիսկեր կստեղծի Մոլդովայի էլեկտրաէներգիայի ոլորտի կայունության համար։
Մոլդովան Ռուսաստանից տարեկան ստանում է մոտավորապես երկու միլիարդ խորանարդ մետր գազ։