Դավիթ Սահակյանց․ Կփորձենք զրոյից ստեղծել այն, ինչ ունեինք ժամանակին

ՀՀ կառավարության որոշման համաձայն՝ առաջիկայում կդադարեցվի Կենտրոն համայնքում գործող «Ռոբերտ Սահակյանցի անվան անիմացիոն արվեստանոց» հասարարակական կազմակերպության գրանցման իրավունքը։ Պարզ ասած՝ ՀԿ-ն այլևս չի կարողանա շարունակել իր աշխատանքը նույն տարածքում: Թեմայի վերաբերյալ Alpha News-ը զրուցել է ռեժիսոր-մուլտիպլիկատոր Դավիթ Սահակյանցի հետ:

«Ինձ բացարձակ հետաքրքիր չէ որևէ մեկնաբանություն, ինձ ասել են՝ պետք է դիմել վարչապետի աշխատակազմ: Ես «հարգելի պարոն եսիմինչյան» նախադասությունը գրելու ցանկություն չունեմ: Ես չեմ ընդունում իրենց ու տվյալ դեպքում այս ամեն ինչին վերաբերվում եմ շատ ավելի փիլիսոփայորեն: Կարծում եմ՝ ինչը ինձ չի սպանում, ուժեղացնում է»,- ասել է Դավիթ Սահակյանցը:

«Ռոբերտ Սահակյանցի անվան անիմացիոն արվեստանոց» ՀԿ-ում աշխատում է 15 հոգի: Սահակյանցի փոխանցմամբ՝ որոշ նախագծեր կփորձեն կյանքի կոչել այլ պայմաններում:

«Հույս ունեմ, որ կլինեն մարդիկ, որոնք միգուցե կարողանան մեզ օգնել տարածքի հարցով, կամ այլ հարցերով: Կգնանք առաջ, կփորձենք զրոյից ստեղծել այն, ինչ ժամանակին ունեինք ու կորցնում ենք այսօր: Այս պահին ստուդիայում 15 աշխատող ունենք: Կան նախագծեր, որոնք կշարունակենք այլ պայմաններում իրագործել»,- եզրափակել է Դավիթ Սահակյանցը: