Արթուր ԽԱՉԻԿՅԱՆ․ ԹՐԱՄՓԻ ՕՐՈՔ ՀԱՅԱՍՏԱՆԻ ԹՇՆԱՄԻՆԵՐԸ ԿՓՈՐՁԵՆ ԲԱՑԵԼ «ԶԱՆԳԵԶՈՒՐԻ ՄԻՋԱՆՑՔԸ» (ՏԵՍԱՆՅՈՒԹ)
Իրանը միակ երկիրն է, որը զսպում է Թուրքիայի և Ադրբեջանի ախորժակը Հայաստանի նկատմամբ, բայց նա չի կարողանա կատարել այդ դերը, եթե ենթարկվի գրոհի ԱՄՆ նախագահի պաշտոնին Դոնալդ Թրամփի վերադարձից հետո։ Այս մասին News.am-ի թղթակցի հետ զրույցում ասել է քաղաքագետ Արթուր Խաչիկյանը։
Նրա գնահատմամբ՝ նման իրավիճակը Հայաստանի թշնամիների համար հնարավորություն կստեղծի ճնշում գործադրել և նույնիսկ ռազմական ճանապարհով փորձել բացել այսպես կոչված «Զանգեզուրի միջանցքը»։ Խաչիկյանը վստահություն է հայտնել, որ Ադրբեջանի նախագահը չի հրաժարվի իր ագրեսիվ քաղաքականությունից՝ չնայած բոլոր զիջումներին։
«Այս ֆոնին Հայաստանի իշխանությունները շարունակում են զիջել և մեզ տանել դեպի անդունդ։ Թուրքական և ադրբեջանական լոբբին այս ֆոնին ակտիվորեն աշխատում է Թրամփի նոր վարչակազմի հետ, Հայաստանը չունի պրոֆեսիոնալ կադրեր, որոնք կկարողանային նման աշխատանք կատարել։ Բացի այդ, սփյուռքի ներկայացուցիչներն ասում են, որ Հայաստանը Թրամփի համար ռազմական-ռազմավարական նշանակություն չունի։ ԱՄՆ առաջին դաշնակիցը Իսրայելն է, որը դաշինքի մեջ է Ադրբեջանի հետ, իսկ երկրորդը՝ Թուրքիան, որին կհանձնի քրդերին»,- ավելեացրել է փորձագետը։
Նրա կարծիքով՝ ԱՄՆ-ի հետ վերջերս ստորագրված փաստաթուղթը Հայաստանի անվտանգության ապահովման հարցում ԱՄՆ-ին ոչ մի պարտավորություն չի վերապահում. Խաչիկյանը սա անվանել է Սևրի նոր պայմանագիր, որի պատճառով Հայաստանը կփչացնի հարաբերությունները Ռուսաստանի և Իրանի հետ և տարածաշրջանում արդեն չորս թշնամի ձեռք կբերի։
Քաղաքագետը հնարավոր է համարել, որ Հայաստանի իշխանությունների քաղաքականությունը կարող է հանգեցնել երկրում էներգակիրների սակագների կտրուկ բարձրացման, կարող են կորել նաև արտահանման զգալի շուկաներ և տրանսֆերտներ։ Նա չի բացառել, որ Հայաստանում սով կարող է սկսվել, և, ըստ նրա, Ռուսաստանը զգուշացրել է այդ հետևանքների մասին։
Արթուր Խաչիկյանը ենթադրել է, որ Թրամփը ցանկանում է դուրս բերել ԱՄՆ-ը ուկրաինական հակամարտությունից և ռեսուրսները վերուղղորդել Մերձավոր Արևելք, քանի որ Իսրայելի պաշտպանությունը նրա համար արտաքին քաղաքականության բացարձակ առաջնահերթություն է։ «Իրանի վրա կարող է հարձակում իրականացվել, կամ Միացյալ Նահանգները կփորձի կոշտ միջոցներ կիրառել՝ ստիպելու Թեհրանին զիջումների գնալ և սահմանափակել իր միջուկային ծրագիրը, ինչպես նաև ապահովել, որ Իրանը չօգնի ոչ Եմենի հութիներին, ոչ ՀԱՄԱՍ-ին: Եթե այս ամենը տեղի չունենա, ապա կարող է հարձակում սկսվել Իրանի վրա։ ԱՄՆ նոր վարչակազմը կարծում է, որ այժմ ժամանակն է լուծելու իսլամական հանրապետության հարցը։ Իսրայելը երկար տարիներ սպասել է այս հնարավորությանը, որպեսզի շարունակի իր օկուպացիոն քաղաքականությունը։ Կարծում եմ, որ Գազայի հատվածում, ինչպես նաև «Հեզբոլլահ» խմբավորման դեմ պայքարը կվերսկսվի»,- ընդգծել է փորձագետը։
Ընդ որում՝ նա կրկնել է, որ Իսրայելի դաշնակիցը Ադրբեջանն է, որտեղ հրեական պետությունը կարևոր շահեր ունի էներգետիկ ոլորտում։ «Իրանի գլխին մութ ամպեր են կուտակվում. կամ նա պետք է զիջումների գնա՝ սահմանափակելով իր միջուկային ծրագիրը, կամ կարող է ենթարկվել օդային հարձակման։ Այս դեպքում Թեհրանը կարձագանքի, որը կհանգեցնի անկանխատեսելի ու վտանգավոր էսկալացիայի, այդ թվում մեզ համար»,- եզրափակել է քաղաքագետը։