ԱՄՆ դատարանն արգելափակել է Թրամփի՝ 2 200 աշխատակիցների արձակուրդ ուղարկելու որոշումը
ԱՄՆ դաշնային դատարանը ուրբաթ օրը նախագահ Դոնալդ Թրամփի վարչակազմին թույլ չի տվել վարչական արձակուրդ ուղարկելլ ԱՄՆ Միջազգային զարգացման գործակալության (USAID) 2 200 աշխատակցի՝ կանգնելով այդ աշխատողներին ներկայացնող արհմիությունների կողմում, տեղեկացրել է CBS News-ը։
ԱՄՆ Կոլումբիայի օկրուգային դատարանի դատավոր Կառլ Նիքոլսը, որին Թրամփը նշանակել է պաշտոնի 2019թ., ուրբաթ ուշ երեկոյան հրապարակված սահմանափակ ժամանակավոր խափանման միջոցի մեջ նշել է, որ թույլ չի տա աշխատակիցներին վարչական արձակուրդ ուղարկել, որը պետք է ուժի մեջ մտնի տեղի ժամանակով կեսգիշերին:
Այս որոշմամբ նա նաև վերականգնել է USAID ևս 500 աշխատակցի, որոնք արդեն արձակուրդ էին ստացել, և կասեցրել է Սպիտակ տան հրամանները, որոնք պահանջում են արտերկրում գտնվող USAID աշխատակիցներին անհապաղ վերադառնալ Միացյալ Նահանգներ:
Նիքոլսը նշել է, որ ժամանակավոր արգելքը, որն արգելափակում է ինչպես վարչական արձակուրդը, այնպես էլ արագացված տարհանումը, ուժի մեջ կմնա մինչև փետրվարի 14-ի կեսգիշերը:
«USAID-ի՝ վարչական արձակուրդում գտնվող բոլոր աշխատակիցները կվերականգնվեն մինչև այդ ամսաթիվը և մինչև այդ ամսաթիվը կստանան էլեկտրոնային փոստի, վճարման և անվտանգության համակարգերի ամբողջական հասանելիություն, և մինչև այդ օրը ոչ մի այլ աշխատակից վարչական արձակուրդի չի ուղարկվի»,- նշել է դատավորը։
Այս գործով դատական լսումները նշանակվել են փետրվարի 12-ին։
Ուրբաթ կեսօրին կայացած դատական նիստում Նիքոլսն ասել է, որ արհմիությունները՝ Ամերիկյան դիվանագիտական ծառայության ասոցիացիան և Կառավարության աշխատակիցների ամերիկյան դաշնությունը, ապացուցել են, որ նրանց «անուղղելի վնաս» կպատճառվի, այն դեպքում, երբ կառավարությունը դա չի արել:
Լսումներում հայցվորները դատարանին խնդրել են անհապաղ դադարեցնել միջազգային գործուղումներում գտնվող USAID աշխատակիցների տարհանման հրամանները և վերականգնել դաշտային պայմաններում գտնվող մարդկանց համար համակարգչային համակարգերի հասանելիությունը բոլոր ստորաբաժանումներում։
ԱՄՆ կառավարությունն ավելի վաղ տեղեկացրել էր, որ USAID 2 200 աշխատակից կեսգիշերին արձակուրդ կուղարկվի՝ չհաշված ևս 500-ը, որոնք արդեն իսկ արձակուրդում են, եթե դատարանի որոշումը չընդունվի։ Ակնկալվում էր, որ 611 մարդ կշարունակի աշխատել USAID-ում, կառավարությունն ավելացրել է, որ չի պլանավորում կրճատել այդ թիվը:
Ավելի վաղ ԱՄՆ վարչակազմը փաստացի դադարեցրել էր USAID գործունեությունը։ Ամերիկայի նախագահ Դոնալդ Թրամփի որոշմամբ այս կառույցի ժամանակավոր ղեկավար է նշանակվել ԱՄՆ պետքարտուղար Մարկո Ռուբիոն։
USAID-ի վերաբերյալ կազմակերպչական եզրակացություններն արվել են ամերիկացի միլիարդատեր, գործարար Իլոն Մասկի առաջարկով, որին Թրամփը նշանակել է նոր դեպարտամենտի՝ ԱՄՆ կառավարության արդյունավետությունը բարելավելու վարչության (Department of Government Efficiency) ղեկավար՝ պետական ուռճացված ապարատի նվազեցման և բյուրոկրատիայի դեմ պայքարելու նպատակով:
News.am