Շահրամանյանը հրամանագիր է ստորագրել Արցախի ԱԺ լիազորությունները երկարաձգելու մասին

Արցախի նախագահը հրամանագիր է ստորագրել՝ Արցախի ԱԺ լիազորությունները երկարաձգելու մասին, հայտնում է «Հրապարակը»։

Հիմքում սահմանադրական այն նորմն է, որ արտակարգ դրության ժամանակ չեն կարող ընտրություններ անցկացվել։ ԱՀ խորհրդարանի լիազորություններն ավարտվում են 2025 թ․ մայիսին։ Հակառակ դեպքում կա՛մ պետք է նոր ընտրություններ անցկացնեին, կա՛մ՝ ԱԺ-ն լուծարվեր, ինչը, ի դեպ, Ալիևի պահանջն է։

«ՀՀ իշխանությունն էլ է կողմ դրան՝ համարելով, որ ԱՀ պետական ինստիտուտները սպառնալիք են ՀՀ անվտանգությանը։ Իհարկե, սա չի նշանակում, որ ԱՀ խորհրդարանն ակտիվ աշխատելու է, բայց իրավական հիմքերը պահելով՝ քաղաքական խնդիր են լուծում, որ Արցախի հարցը չփակվի, և աշխարհաքաղաքական նպաստավոր զարգացումների դեպքում կարող են իրենց մանդատները գործի դնել»,-գրում է պարբերականը:

Հիշեցնենք՝ Արցախի Հանրապետության 7-րդ գումարման Ազգային ժողովն ընտրվել է 2020 թվականի մայիսի 21-ին։ Նրա գործունեությունը խաթարվել է 2023 թ. սեպտեմբերին՝ Ադրբեջանի ագրեսիայից ու Արցախի ժողովրդի բռնի տեղահանությունից հետո։

Արցախի Ազգային ժողովի նախագահի պարտականությունները կատարում է Գագիկ Բաղունցը։

Sputnik Արմենիա