Սերոբ Գասպարյանի իշխանությունը յուրացնելու նախապատրաստության մասին քրգործի նախաքննությունն ավարտվել է

«Սև հովազ» ռազմահայրենասիրական հ/կ ղեկավար Սերոբ Գասպարյանի և այլ անձանց կողմից իշխանությունը յուրացնելու նախապատրաստություն կատարելու վերաբերյալ քրեական վարույթի նախաքննությունն ավարտվել է և ուղարկվել դատարան, հայտնել է ՔԿ-ն։

Ըստ հաղորդագրության՝ Գասպարյանը, Ե.Ս.-ի, Ա.Մ.-ի և ինքնությունները դեռևս չպարզաբանված այլ անձանց հետ կատարել է իշխանությունը յուրացնելու նախապատրաստություն։

ՔԿ-ն պարզել է, որ նրանք ՀՀ իշխանությունը զավթելու նպատակով վճարի դիմաց եռամսյա հավաքներ անցնելու և նոր ծանր զինատեսակներին ծանոթանալու պատրվակով 2024 թվականի ընթացքում հավաքագրել են մի շարք անձանց: Նրանք տարբեր խմբերով մեկնել են արտերկիր, որտեղ անցել են նախնական ստուգումներ, այդ թվում՝ պոլիգրաֆի միջոցով, որի ընթացքում փորձել են պարզել նրանց անձնային հատկանիշներն ու հայացքները, առնչությունը ՀՀ իրավապահ մարմինների հետ:

Անձանց տեղակայել են Ա․Ս․-ի ղեկավարմամբ գործող տարածքում և նրանց հետ անցկացրել մարտ վարելու պարապմունքներ:

Հավաքագրված անձանց մի մասը զինված հեղաշրջմանը մասնակցելու մասին իմանալով հրաժարվել է և վերադարձել ՀՀ։

Ս․Գ․-ի, Ե․Ս․-ի և Ա․Մ․-ի նկատմամբ հարուցվել է հանրային քրեական հետապնդում՝ Քրեական օրենսգրքի 43-419-րդ հոդվածի 1-ին մասով (իշխանության յուրացումը նախապատրաստելը, պատժվում է ազատազրկում՝ մինչև 15 տարի ժամկետով):

Armenia Today