Բաքվում ընթացող «դատին» ցուցմունք են տվել Արկադի Ղուկասյանն ու Բակո Սահակյանը

Բաքվում տեղի է ունեցել Արցախի ռազմաքաղաքական ղեկավարների ու մյուս գերիների «դատավարության» հերթական նիստը, հայտնում են ադրբեջանական լրատվամիջոցները։ Նշվում է, որ այսօր ցուցմունքներ են տվել Արցախի նախկին նախագահներ Արկադի Ղուկասյանն ու Բակո Սահակյանը։

Նշվում է, որ առաջարկվել է ցուցմունք տալ նաև Արայիկ Հարությունյանին: Սակայն նա դատարանից լրացուցիչ ժամանակ է խնդրել նախապատրաստվելու համար։

Հիշեցնենք, որ հունվարի 17-ից Ադրբեջանում ընթանում է Արցախի նախկին ռազմաքաղաքական առաջնորդների գործով «դատավարությունը»: Մեղադրյալների թվում են նախկին նախագահներ Արկադի Ղուկասյանը, Բակո Սահակյանը, Արայիկ Հարությունյանը, պաշտպանության բանակի նախկին հրամանատար Լևոն Մնացականյանը, նախկին արտգործնախարար Դավիթ Բաբայանը և այլք:

Նախկին պետնախարար և բարերար Ռուբեն Վարդանյանի գործը քննվում է առանձին վարույթով: Չնայած գործի նյութերը մյուսների հետ միավորելու նրա խնդրանքին` դատարանը որոշել է 422 հատորներից 400-ը դիտարկել առանձին:

Sputnik Արմենիա