Արամ ՕՐԲԵԼՅԱՆ․ ԱՌԱՋԱՐԿԱԾ ՓՈՓՈԽՈՒԹՅՈՒՆՆԵՐԸ ԶԳԱԼԻՈՐԵՆ ԿՄԵԾԱՑՆԵՆ ԴԱՏԱՐԱՆՆԵՐԻ ԾԱՆՐԱԲԵՌՆՎԱԾՈՒԹՅՈՒՆԸ (ՏԵՍԱՆՅՈՒԹ)
Իշխանությունների առաջարկած փոփոխությունները զգալիորեն կմեծացնեն դատարանների ծանրաբեռնվածությունը: Այս մասին մարտի 19-ին Հայաստանի վարչական դատավարության օրենսգրքում փոփոխություններ և լրացումներ կատարելու մասին օրենքի նախագծի քննարկման ժամանակ հայտարարեց փաստաբան Արամ Օրբելյանը։
Նրա գնահատմամբ՝ սա ավելի է խորացնում խնդիրները։
Խնդիրն այն է, որ դատավորների թիվը պետք է ավելացվի 5-7 անգամ, քանի որ պետության պարտավորությունները ներառում են ողջամիտ ժամկետներում դատական պաշտպանության ապահովումը, պարզաբանեց նա։
«Գուցե պետք է ոչ թե 7 անգամ ավելացնել դատավորների թիվը, այլ գնալ վարչարարության բարելավման ճանապարհով, որպեսզի որոշումները չբողոքարկվեն դատարանում»,- նշեց Օրբելյանը։
Նրա կարծիքով, պետությունն այս նախագծով ասում է, որ չի ցանկանում իր վրա կրել երկարատև դատական գործընթացների ռիսկերը, թեև ինքն է պարտավոր ապահովել ողջամիտ ժամկետներ։
Փաստաբանը կարծում է, որ առաջարկվող փոփոխությունները նույնպես կիսատ են լինելու՝ ամբողջ հայեցակարգը դարձնելով հակասահմանադրական։
Ըստ նախագծի՝ եթե քաղաքացու կամ տնտեսվարող սուբյեկտի ներկայացուցչի նկատմամբ վարչական ակտ է կայացվում, ապա այն բողոքարկելը չի կասեցնի տուգանքի վճարումը։ Յուրաքանչյուր կոնկրետ դեպքում հայցի ապահովման միջոց կիրառելու, դրա վերացման կամ բողոքարկման անհրաժեշտության վերաբերյալ հարցերը պետք է ներկայացվեն և դառնան դատարանի քննարկման առարկա։
Եթե քաղաքացու կամ տնտեսվարող սուբյեկտի ներկայացուցչի նկատմամբ վարչական ակտ է կայացվել, և դատարանը հայցի ապահովման միջոց չի կիրառել, վեճը չի կասեցնում վճարումը։