Արգիշտի ԿԻՎԻՐՅԱՆ․ ԱԴՐԲԵՋԱՆԸ ՓԱՇԻՆՅԱՆԻՑ ՊԱՀԱՆՋՈՒՄ Է ԽԱՂԱՂՈՒԹՅԱՆ ՊԱՅՄԱՆԱԳԻՐ ՍՏՈՐԱԳՐԵԼ ԲԱՔՎՈՒՄ (ՏԵՍԱՆՅՈՒԹ)
Իմ տեղեկություններով, պահանջ է առաջադրվել, որ Փաշինյանը գնա Բաքու և այնտեղ խաղաղության պայմանագիր կնքի։ Դրա մասին News.am-ի «Ուժի գործոն» հաղորդման ժամանակ նշել է քաղաքական վերլուծաբան Արգիշտի Կիվիրյանը։
Նրա կարծիքով՝ Ադրբեջանը պահանջում է Փաշինյանի այցը Բաքու ոչ միայն նրան անձամբ նվաստացնելու, այլև Հայաստանի վերջնական կապիտուլյացիայի հասնելու համար։
«Փաշինյանը Ռուսաստանի միջոցով փորձեց ապահովել, որ փաստաթուղթը ստորագրվի Մոսկվայում, ուր Ալիևը նույնպես կգնա մայիսի 9-ին։ Ռուսաստանի համար սա մեծ նվեր կլիներ, քանի որ թելադրողի դերը կունենար այն երկիրը, որտեղ ստորագրվում է փաստաթուղթը։ Հենց այդ նպատակով էլ Մատվիենկոն Պուտինի և Փաշինյանի հեռախոսազրույցից հետո մեկնեց Բաքու՝ ուսումնասիրելու, թե արդյոք Ադրբեջանը կհամաձայնի՞ դրան, թե՞ ոչ։
Ինչ վերաբերում է ավիավթարից հետո Մոսկվայի և Բաքվի հարաբերությունների լարվածությանը, Կադիրովը նախ ներողություն խնդրեց, ապա Մոսկվան պատրաստակամություն հայտնեց փոխհատուցում վճարել, ինչպես նաև հայտարարեց, որ քննարկվում է Ռուսաստանի մայրաքաղաքում Հեյդար Ալիևի հուշարձանի տեղադրման հարցը, որը սրբազան նշանակություն ունի Ադրբեջանի համար։
Մատվիենկոն ևս ներողություն է խնդրել, բայց սա հրապարակային էր։ Եվ ոչ հրապարակային հարթությունում նա հնչեցրել է Մոսկվայում փաստաթղթի ստորագրման հնարավորության մասին: Այդ սցենարը Փաշինյանի համար փրկություն կլիներ Բաքու մեկնելուց հրաժարվելու առումով և նրան հնարավորություն կտար դուրս գալ ստեղծված իրավիճակից»,- նշել է վերլուծաբանը։
Կիվիրյանը հավելել է, որ Երևանի և Բաքվի միջև ոչ մի բանակցություն չի եղել, Հայաստանը համաձայնել է Ադրբեջանի բոլոր պահանջներին՝ հետևողականորեն կատարելով դրանց բոլոր կետերը։
«Միևնույն ժամանակ, Բաքուն ոչ մի առաջարկ չի ընդունել, քանի որ Հայաստանը թույլ է համարում և վստահ է, որ Փաշինյանի օրոք կարող է առավելագույնը պոկել։
Բայց եթե Ալիևը հայտարարի, որ այլևս չի ցանկանում բանակցել Փաշինյանի հետ, ապա գերտերությունները կարճ ժամանակում նրան կհեռացնեն, քանի որ այս պահին մեր տարածաշրջանում էսկալացիա ոչ մեկին պետք չէ։ Ադրբեջանը դա շատ լավ հասկանում է, և նաև, որ դրանից է կախված՝ Փաշինյանը կմնա՞ իշխանության, թե՞ ոչ։
Ադրբեջանին խաղաղություն պետք չէ, ուստի չի շտապում ստորագրել համաձայնագրի նույնիսկ իր համար ցանկալի տարբերակը»,- ընդգծել է Կիվիրյանը։