ԱՆԱՆՅԱՆ․ ԻՆՉՈՒ՞ ՄԵԶ ԱՎԵԼԻ ՇԱՏ ՄՏԱՀՈԳՈՒՄ Է ՖՈՒՏԲՈԼՈՒՄ ՊԱՐՏՈՒԹՅՈՒՆԸ, ՔԱՆ ԵՐԿՐԻ ՃԱԿԱՏԱԳԻՐԸ
Հայաստանի հավաքականի պարտությունը Վրաստանի դեմ խաղում մեծ արձագանք գտավ հանրության շրջանում՝ դառնալով հուզական ալիքների առիթ։
Այս մասին իր էջում գրել է ՊԵԿ նախկին նախագահ Դավիթ Անանյանը՝ ընդգծելով, որ այսպիսի արձագանքներն արտացոլում են հայկական կոլեկտիվ հոգեբանության առանձնահատկությունները։
Նրա խոսքով՝ հանրությունը ակնթարթային և քաոսային կերպով արձագանքում է խորհրդանշական իրադարձություններին՝ ընկալելով դրանք որպես գոյաբանական պարտություններ, ինչի հետևանքով ստվերվում են ժամանակի իրական մարտահրավերները։ Անանյանը նշել է, որ ազգային անվտանգության, տնտեսական և մշակութային ինքնության առանցքային հարցերը մնում են ուշադրությունից դուրս, մինչդեռ սպորտային պարտություններն ու դրանց շուրջ ստեղծված «առասպելաբանությունը» դառնում են հանրային քննարկման կենտրոն։
«Ինչո՞ւ ենք մենք պատրաստ խոշոր էմոցիոնալ ռեսուրսներ վատնել համեմատաբար աննշան պարտությունների վրա, բայց չենք նույն կերպ արձագանքում մեր պետության ապագային սպառնացող մարտահրավերներին»,- հարցնում է Անանյանը։
Նա ընդգծել է, որ Հայաստանի դիրքն աշխարհում չի որոշվելու ֆուտբոլային հաղթանակներով, այլ մեր կարողությամբ՝ հարմարվել իրականությանը, հաղթահարել ներքին ճգնաժամերն ու գտնել զարգացման ուղիներ։