Գյումրու համայնքապետի թեկնածուի որդին ու հայրը ազատ արձակվեցին

ՀՀ ԱԺ «Պատիվ ունեմ» խմբակցության պատգամավոր, «Մեր քաղաքը» դաշինքի կողմից Գյումրու համայնքապետի թեկնածու Մարտուն Գրիգորյանի որդին` Կարեն Գրիգորյանը, և հայրը` Կամո Գրիգորյանը, ազատ արձակվեցին դատարանի դահլիճից։

Իրավապահները մարտի 27–ին խուզարկություններ էին իրականացրել Մարտուն Գրիգորյանի տանը։ Նա մանրամասնել էր, որ մարտի սկզբին որպես պատգամավոր փողոցներ է «շեբենապատել», ինչը փորձում են ներկայացնել որպես ընտրակաշառք։ Նույն օրը «շեբենի գործով» ձերբակալվեցին Գրիգորյանի հայրը և որդին։

Կամո Գրիգորյանի փաստաբան Արսեն Բաբայանը Հակակոռուպցիոն դատարանի մոտ հայտարարեց, որ իր պաշտպանյալի գործով նիստը խայտառակություն էր։ Նա նշեց, որ քննիչը հայտարարել է, թե հրաժարվում է պատասխանել պաշտպանների բոլոր հարցերին։

Փաստաբանը շեշտեց` քննիչը նաև չի կարողացել որևէ փաստական հանգամանք ներկայացնել Կամո Գրիգորյանի հանցանք կատարելու մասով։

«Դատարանը` դատավոր Վարդգես Ստեփանյանի նախագահությամբ, կա՛մ չուզեց, կա՛մ չկարողացավ պարտավորեցնել, որպեսզի մեր հարցերին պատասխանի։ Հարց տալու և դրա պատասխանը ստանալու իրավունքը նախատեսված է քրեական դատավարության օրենսգրքով։ Ակնհայտ է, որ այս հետապնդումը քաղաքական բնույթ ունի ու ես դատարանում այդ մասին ասել եմ։ Ես նաև ընդգծել եմ, որ թեկնածուներից մեկը` Սարիկ Մինասյանը, տնակներ էր այցելել օրեր առաջ, որտեղ բնակիչներից մեկին ասել էր. «հենց փայտդ վերջանա, քեզ փայտ կուղարկեմ»։ Սա արեցի, քանի որ խտրական վերաբերմունք կա»,– ասաց Բաբայանը։

Փաստաբանը նշեց, որ «Մեր քաղաքը» դաշինքի ձերբակալված անձանց վերաբերյալ կազմված նյութերն ամբողջությամբ նույնն են, անգամ տառասխալները, միայն մի երկու տեղ անուններն են փոխվել։

Արսեն Բաբայանը հայտնեց, որ նիստի ընթացքում իր պաշտպանն էլ է ելույթ ունեցել ու ասել, որ 2007 թվականից իրենք իրականացրել են խճապատման աշխատանքներ, ու այդ ամենը չի կարող որևէ առնչություն ունենալ քարոզարշավի հետ։

Ավելի ուշ նա տեղեկացրեց, որ Հակակոռուպցիոն դատարանը բավարարել է քննիչի միջնորդությունը և վարչական հսկողություն կիրառել Կամո Գրիգորյանի նկատմամբ։ Որոշումն անժամկետ է կայացվել։ Գրիգորյանը ժամը 20։00-ից մինչև 08։00-ն իր բնակարանը լքելու իրավունք չունի, իսկ բնակության վայրը փոխելու անհրաժեշտության դեպքում պետք է թույլտվություն ստանա նախաքննության մարմնից։

«Կամո Գրիգորյանին արգելվել է նաև շփվել սույն վարույթով անցնող այլ անձանց հետ։ Դատարանն արձանագրեց, որ «այլ անձ» ասելով` նկատի ունեն ոչ թե բոլորին, այլ նրանց, ովքեր կարող են որևէ կերպ կապ ունենալ այս գործի հետ։ Ամեն դեպքում մեզ համար պարզ չէ, թե ովքեր կարող են լինել այդ անձինք` ելնելով նախաքննության գաղտնիությունից։ Ես խնդրել եմ, որ մեզ հայտնեն հստակ, թե ում հետ չի կարելի շփվել։ Քննիչը խոստացել է, որ կհայտնի այդ ցանկը»,– նշեց Բաբայանը։

Նա պարզաբանեց` եթե Կամո Գրիգորյանը շփվի մի անձի հետ, որը կապ ունի վարույթի հետ, բայց չիմանա այդ մասին ու հնարավոր լինի դա հիմնավորել, ապացուցել, ապա նրա նկատմամբ չեն կարող խափանման միջոցը փոխել։

Sputnik Արմենիա