Բաքվում կայացել է Ռուբեն Վարդանյանի «դատավարության» հերթական նիստը

Այսօր Բաքվում կայացել է Արցախի նախկին պետնախարար Ռուբեն Վարդանյանի «դատավարության» հերթական նիստը:

Ինչպես հաղորդում են ադրբեջանական լրատվամիջոցները, Վարդանյանին, իբր, հարցաքննել են։ Սակայն հայտնի չէ՝ նա պատասխանել է հարցերին, թե ոչ։ Նշվում է, որ Վարդանյանին տրամադրել են թարգմանիչ և փաստաբան, ում ինքն է ընտրել:

Բացի այդ, «դատավարության» ընթացքում հարցաքննվել են մի շարք «տուժողներ», պնդում են Բաքվի լրատվամիջոցները:

Դատական հաջորդ նիստը նշանակվեց ապրիլի 8-ին:

Հիշեցնենք` հունվարի 17-ից Ադրբեջանում ընթանում է Արցախի նախկին ռազմաքաղաքական առաջնորդների գործով «դատավարությունը»: Մեղադրյալների թվում են նախկին նախագահներ Արկադի Ղուկասյանը, Բակո Սահակյանը, Արայիկ Հարությունյանը, Արցախի ԱԺ նախագահ Դավիթ Իշխանյանը, պաշտպանության փոխնախարար Դավիթ Մանուկյանը, ՊԲ նախկին հրամանատար Լևոն Մնացականյանը, նախկին արտգործնախարար Դավիթ Բաբայանը և այլք:

Նախկին պետնախարար և բարերար Ռուբեն Վարդանյանի գործը քննվում է առանձին վարույթով: Չնայած գործի նյութերը մյուսների հետ միավորելու նրա խնդրանքին` դատարանը որոշել է 422 հատորներից 400-ը դիտարկել առանձին:

Ռուբեն Վարդանյանը փետրվարի 19–ից հացադուլ սկսեց, որը դադարեցրեց մարտի 13-ին։

Sputnik Արմենիա