Նոր հանգամանքներ են ի հայտ եկել. Վայոց Ձորի նախկին մարզպետի օգնականը կրկին կկալանավորվի
Փոխգնդապետ Արա Մխիթարյանին դաժանաբար ծեծի ենթարկելու գործով նոր քննություն կիրականացվի, մեղադրյալ Հարություն Գրիգորյանը կրկին կալանքի կվերցվի։ Այս մասին հայտնում է «Փաստինֆոն»։
Մխիթարյանը դաժան ծեծի էր ենթարկվել 2019 թվականի սեպտեմբերի 18-ին, ծեծից հետո 4 տարի կոմայի մեջ գտնվող փոխգնդապետը մահացել է 2023 թվականի հուլիսին։Գործով միակ դատապարտյալը՝ նախկին մարզպետ Տրդատ Սարգսյանի օգնական Հարություն Գրիգորյանը, 2024 թվականի փետրվարին պայմանական վաղաժամկետ ազատ էր արձակվել։
Լրատվամիջոցի փոխանցմամբ` Արա Մխիթարյանի մահվան վերաբերյալ նոր ի հայտ եկած հանգամանքների քննության արդյունքներով գլխավոր դատախազի տեղակալը վճռաբեկ բողոք է ներկայացրել, որը քննվել է գրավոր ընթացակարգով։ Ըստ բողոքի՝ առկա են նոր ի հայտ եկած հանգամանքներ, որոնք ապացուցում են դատապարտյալ Հարություն Գրիգորյանի հանցանքի ավելի ծանր լինելը։
Փորձաքննության արդյունքում պարզվել է, որ տուժողի մահը պատճառահետևանքային կապի ունի նրա ստացած մարմնական վնասվածքների և դրանց արդյունքում զարգացած բարդությունների հետ։
«Վճռաբեկ դատարանը որոշել է գործն ուղարկել Արարատի և Վայոց Ձորի մարզերի ընդհանուր իրավասության դատարան՝ նոր քննության։ Միևնույն ժամանակ Հարություն Գրիգորյանին երկու ամսով կալանավորելու որոշում է կայացվել»,– հայտնում է լրատվամիջոցը։
Հիշեցնենք, որ փոխգնդապետ Արա Մխիթարյանը դաժան ծեծի էր ենթարկվել 2019 թ. սեպտեմբերի 18-ին Վայոց Ձորի մարզի Եղեգնաձոր քաղաքի Արսենյան փողոցի շենքերից մեկի բակում։ Հարազատների պնդմամբ՝ փոխգնդապետի նկատմամբ կիրառված բռնությանն անմիջական մասնակցություն է ունեցել նաև Տրդատ Սարգսյանը, որը հենց այս աղմուկի հետևանքով հայտարարեց մարզպետի պաշտոնից հրաժարական տալու մասին։
Sputnik Արմենիա