Երևանում վարորդին բերման են ենթարկել հայհոյելու պատճառով. ՆԳՆ-ն` տարածվող տեսանյութի մասին (ՏԵՍԱՆՅՈՒԹ)

Երևանում պետական արարողակարգային միջոցառումների շրջանակում վարորդներից մեկը բերման է ենթարկվել հայհոյանք հնչեցնելու համար։ Այս մասին Sputnik Արմենիային հայտնեցին ՆԳՆ մամուլի ծառայությունից։

Նշենք, որ համացանցում տեսանյութ է տարածվել, որում երևում է` ինչպես են 4 պարեկներ մեքենայից իջեցնում վարորդին, գցում գետնին և ձեռնաշղթաներ հագցնում։

«Պետական արարողակարգային միջոցառումների շրջանակում, երբ ոստիկանության ծառայողները ապահովել են մեքենաների շարասյան անցումը, վարորդներից մեկը հայհոյանք է հնչեցրել: Նա բերման է ենթարկվել համայնքային ոստիկանության կենտրոնական բաժին: Պարզաբանումներից հետո ազատ է արձակվել»,–հայտնեցին ՆԳՆ–ից։

Նշենք, որ Գերմանիայի նախագահ Ֆրանկ-Վալտեր Շտայնմայերը Հայաստան էր ժամանել մարտի 30-ին։ Նրան դիմավորելու համար Երևանի կենտրոնում երթևեկությունը կաթվածահար էր եղել, վարորդները ստիպված էին մնալ խցանման մեջ։

Տարածաշրջանային այցի շրջանակում Գերմանիայի նախագահը մարտի 31–ին մեկնեց Ադրբեջան։