ԱՀԿ ղեկավարը կոչ է անում նախապատրաստվել նոր համաճարակին

Վտանգավոր հիվանդության նոր համաճարակ կարող է բռնկվել աշխարհում արդեն «վաղը»։ Այդ մասին նախազգուշացրել է Առողջապահության համաշխարհային կազմակերպության (ԱՀԿ) գլխավոր տնօրեն Թեդրոս Ադհանոմ Գեբրեիսուսը՝ կոչ անելով երկրներին ակտիվացնել աշխատանքը համաճարակի կանխարգելման համար համաձայնագրի շուրջ։

Խոսելով ԱՀԿ անդամ երկրների դեսպանների հետ՝ նա նշել է, որ «COVID-19 համաճարակն այժմ կարծես հեռավոր հիշողություն է»՝ հակամարտությունների, աշխարհաքաղաքական և տնտեսական ցնցումների ֆոնին։ «Սակայն հաջորդ համաճարակը չի սպասի, որ ամեն ինչ հանդարտվի: Դա կարող է տեղի ունենալ 20 կամ ավելի տարի անց, կամ դա կարող է տեղի ունենալ վաղը: Մենք պետք է պատրաստ լինենք»,-ասաց Գեբրեիսուսը և հավելեց. «Ահա թե ինչու աշխարհին անհրաժեշտ է ձեր ներգրավվածությունն ու առաջնորդությունը՝ ԱՀԿ համաճարակի պայմանագիրն ավարտին հասցնելու համար»։

Նա հիշեցրել է, որ համաշխարհային առողջապահական անվտանգության հասնելը պահանջում է «համակարգված ջանքեր և ընդհանուր սպառնալիքների նկատմամբ միասնական մոտեցում»։

«Բանակցողները «ավելի քան երեք տարի քրտնաջան աշխատել են համաձայնագիր ստեղծելու համար, որը հիմնված է ցավալի դասերի վրա, որոնք մենք քաղել ենք որպես համաշխարհային հանրություն՝ միաժամանակ հավասարակշռելով անդամ երկրների տարբեր կարիքներն ու առաջնահերթությունները: Ես հավատում եմ, որ դուք պատրաստ եք գնալ կոնսենսուսի»,-եզրափակել է Գեբրեիսուսը։

Panorama.am