Առևտրային պատերազմներում հաղթողներ չկան. Դյուժարիկը՝ ԱՄՆ-ի մաքսատուրքերի մասին

ՄԱԿ-ի գլխավոր քարտուղարի ներկայացուցիչ Ստեֆան Դյուժարիկը, մեկնաբանելով ԱՄՆ-ի սահմանած մաքսատուրքերը, հայտարարել է, որ դա բացասական ազդեցություն կունենա կայուն զարգացման նպատակների վրա: Այս մասին նա հայտարարել է այսօր կայացած ճեպազրույցի ժամանակ։

«Առևտրային պատերազմներում ոչ ոք չի հաղթում»,-ասել է Դյուժարիկը:

Նա նաև նշել է, որ ԱՄՆ իշխանությունների համապատասխան որոշումը բացասաբար կանդրադառնա կայուն զարգացման նպատակների վրա:

Ապրիլի 2–ին ԱՄՆ նախագահ Դոնալդ Թրամփը հայտարարել է այլ երկրներից ներմուծման համար փոխադարձ մաքսատուրքեր սահմանելու մասին: Բազային նվազագույն դրույքաչափը կկազմի 10%, բայց յուրաքանչյուր երկրի համար սակագինը կկարգավորվի և կկազմի այն գումարի կեսը, որը նրանք գանձում են ամերիկյան ապրանքներ ներմուծող ընկերություններից: Քաղաքական գործչի կարծիքով՝ դա ԱՄՆ-ի տնտեսական անկախության հռչակագիրը կդառնա և կօգնի հսկայական միջոցներ օգտագործել պետական պարտքը վճարելու համար: ԵՄ երկրներից ներմուծման համար մաքսատուրքը կկազմի 20 տոկոս։

Իր հերթին ԱՄՆ ֆինանսների նախարար Սքոթ Բեսենթն այլ երկրներին նախազգուշացրել է ամերիկյան ներմուծման մաքսատուրքերին պատասխան միջոցներ չձեռնարկել՝ ընդգծելով, որ դա կարող է միայն սրացում հրահրել առևտրային ոլորտում:

Sputnik Արմենիա