Արցախցիները նախատեսում են զանգվածային գործողություններ` իրավունքների վերականգնման համար
ՀՀ կառավարությունը պատշաճ կերպով չի արձագանքել արցախցիների պահանջներին, ուստի որոշում է ընդունվել շարունակել պայքարել։ Այս մասին հայտարարություն է տարածել Արցախցիների իրավունքների պաշտպանության խորհուրդը։
Ապրիլի 3-ին հայտնի դարձավ, որ Արցախցիների իրավունքների պաշտպանության խորհրդի անդամները հանդիպել են ՀՀ փոխվարչապետ Տիգրան Խաչատրյանի հետ, որը հստակ ասել է` «40+10» ծրագրին հետդարձ չկա։
Ավելի վաղ հայտնել էինք, որ Արցախից բռնի տեղահանվածների աջակցության ծրագիրը 2025 թվականի ապրիլի 1–ից կրճատվել է։ Աշխատունակ արցախցիներն այլևս չեն ստանալու 40 000+10 000 դրամ բնակվարձի գումարը։
Արցախցիների իրավունքների պաշտպանության խորհուրդը նշում է՝ ՀՀ կառավարության գրավոր պատասխանը գլխավորապես չի համապատասխանում իրենց պատկերացումներին: Միակ գործնական առաջարկը եղել է փորձագիտական խմբերի ձևավորումը՝ որոշակի լուծումներ մշակելու նպատակով:
Ուստի խորհուրդը դիմում է արցախյան, հայաստանյան ու սփյուռքի բոլոր սրտացավ հասարակական ու քաղաքական ուժերին ու գործիչներին՝ կոչ անելով համախմբվել և աջակցել այս պայքարին: Բոլոր ցանկացողները կարող են մոտենալ Ազատության հրապարակում տեղակայված շտաբ-վրան, որտեղ համատեղ կքննարկվեն հետագա գործողությունները:
«Մինչև ապրիլի 15-ը տեղի ունեցող հանրային լայն քննարկումների ու համախմբման արդյունքում մենք կհայտարարենք մեր հաջորդ մեծ հանրահավաքի օրն ու վայրը, որին կհաջորդեն կոնկրետ զանգվածային գործողություններ»,- նշված է հայտարարության մեջ։
Այս ընթացքում տարբեր վայրերում կազմակերպվելու են բողոքի ու իրազեկման տեղային հավաքներ։
Հիշեցնենք, որ արցախցիների իրավունքների պաշտպանության խորհրդի կողմից մարտի 29-ին Երևանի Ազատության հրապարակում կազմակերպված մեծ հանրահավաքում ներկայացվեց պահանջագիր՝ ուղղված ՀՀ իշխանություններին և միջազգային հանրությանը:
Sputnik Արմենիա