Քասախ և Պռոշյան համայնքի բնակիչները փակել են Աշտարակ տանող մայրուղին (ՏԵՍԱՆՅՈՒԹ)

Կոտայքի մարզի Պռոշյան և Քասախ գյուղերի բնակիչները փակել են Երևան – Աշտարակ ավտոճանապարհը։

Նրանք պահանջում են, որ տարածքային կառավարման և ենթակառուցվածքների նաախարարությունը չեղյալ հայտարարի որոշումը, ըստ որի` Պռոշյան-Երևան ուղևորափոխադրումը պետք է իրականացվի «ՄուլտիՏրանսպորտ» ՍՊԸ-ին պատկանող թիվ 277 միկրոավտոբուսով, որի արժեքը 250 դրամ է։

«Մեր պահանջն է, որ չմտնեք մեր գրպանը, չդադարեցնեք նախկին երթուղին։ Եթե չանեք, նստացույց ենք անելու այստեղ»,- ասաց ակցիայի մասնակիցներից մեկը։

Նշենք, որ մինչ այժմ Երևանի հետ կապն ապահովվել է «Երևան Տրանսպորտ» ՓԲԸ-ին պատկանող թիվ 25 երթուղիով, ուղեգիծը՝ Պռոշյան-Ավան-Զեյթուն։

«Պռոշյանը լիովին կապված է Երևանին, բոլորի աշխատավայրերը Երևանում են, ուսանողները Երևան են գալիս։ Ճանապարհը ընդամենը 5 կմ է, ի՞նչ է նշանակում մարզային տրանսպորտ, ո՛չ, մերը քաղաքային տրանսպորտն է»,- ասաց ակցիայի մեկ այլ մասնակից։

Նրանք վստահեցրին, որ ոտքով կգնան, բայց չեն օգտվի նոր ավտոբուսներից:

Բնակիչներին վստահեցրին, որ մինչև երկուշաբթի 25 համարի երթուղին կաշխատի, իսկ երկուշաբթի 20–հոգանոց խմբի կընդունեն կառավարությունում։

Sputnik Արմենիա