Դատարանը թույլ է տվել Գագիկ Խաչատրյանին մեկնել Գերմանիա, դատախազությունը՝ ոչ

ՊԵԿ նախկին նախագահ, ֆինանսների նախկին նախարար Գագիկ Խաչատրյանին կրկին արգելել են մեկնել Գերմանիա։ Տեղեկությունը հայտնում է փաստաբան Երեմ Սարգսյանը։

Նրա խոսքով` Հակակոռուպցիոն դատարանը ապրիլի 3-ին թույլատրել է, որ Խաչատրյանը 2 ամսով մեկնի Գերմանիա՝ անհրաժեշտ վիրահատությունն ունենալու և վերադառնալու համար

«Բայց այդ որոշումից ընդամենը ժամեր անց՝ ապրիլի 4-ին՝ ժամը 12։20-ին, դատախազը որոշել է հանրային քրեական հետապնդում հարուցել, որից անմիջապես հետո Գագիկ Խաչատրյանի նկատմամբ որպես խափանման միջոց է կիրառվել բացակայելու արգելքը»,– գրել է փաստաբանը ֆեյսբուքյան էջում։

Փաստաբանը նշել է, որ ՀՀ ոստիկանությանը կրկին հանձնարարվել է արգելել Գագիկ Խաչատրյանի մեկնումը Գերմանիա։

Երեմյանն ընդգծել է, որ եվրոպական կոնվենցիայի 2-րդ (կյանքի իրավունք) և 3-րդ (խոշտանգման արգելք) հոդվածների խախտման հիմքով Մարդու իրավունքների եվրոպական դատարան ներկայացված գանգատի կապակցությամբ այս պահին ակտիվ քննություն է իրականացվում, և Մարդու կիրավունքների եվրոպական դատարանը բավականին խիստ հարցեր է առաջադրել ՀՀ կառավարությանը։

Հիշեցնենք` դատախազությունը Գագիկ Խաչատրյանից և նրան փոխկապակցված 25 անձանցից (այդ թվում` որդիներ Գուրգեն և Արտյոմ Խաչատրյաններից) պահանջում է բռնագանձել 210 անշարժ գույք և ավելի քան 40 մլրդ դրամ:

Sputnik Արմենիա