Բայրամովը հանդիպել է Իսրայելի արտգործնախարար Գիդեոն Սաարի հետ

ԱՄԷ կատարած այցի ընթացքում Ադրբեջանի արտգործնախարար Ջեյհուն Բայրամովը հանդիպել է Իսրայելի արտգործնախարար Գիդեոն Սաարի հետ։

Ինչպես հաղորդել է APA-ն, այս մասին հայտնել է Ադրբեջանի ԱԳՆ-ն։

Հանդիպման ընթացքում կողմերը քննարկել են տնտեսության, առևտրի, էներգետիկայի, բարձր տեխնոլոգիաների, պաշտպանության և փոխադարձ հետաքրքրություն ներկայացնող այլ ոլորտներում համագործակցության հարցերը։ Օրակարգում էին նաև տարածաշրջանային և միջազգային անվտանգության հարցերը, այդ թվում՝ Մերձավոր Արևելքում տիրող իրավիճակը։ Տեղի է ունեցել մտքերի լայն փոխանակություն երկկողմ և բազմակողմ համագործակցության, այդ թվում՝ տարածաշրջանային և միջազգային թեմաների շուրջ։

«Հանդիպման ժամանակ նաև տեղեկատվություն է տրամադրվել տարածաշրջանի հետհակամարտային վերականգնման և խաղաղության օրակարգի, Ադրբեջանի և Հայաստանի միջև հարաբերությունների կարգավորման գործընթացի, այդ թվում՝ խաղաղ գործընթացում առկա խնդիրների մասին»,- մեջբերել է աղբյուրը։

Իսրայելի արտգործնախարար Գիդեոն Սաարը նշել է, որ Աբու Դաբիում իր ադրբեջանցի գործընկեր Ջեյհուն Բայրամովի հետ քննարկել է մի շարք հարցեր։ Իսրայելցի նախարարի խոսքով՝ Ադրբեջանի և Իսրայելի հարաբերություններն ընդլայնվում են և ընդգրկում են ռազմավարական, դիվանագիտական, տնտեսական, էներգետիկ և այլ ասպեկտներ։ «Մենք կշարունակենք ուժեղացնել դրանք»,- ավելացրել է Գիդեոն Սաարը։

News.am