Զախարովա. Ղարաբաղյան կարգավորման հարցով Մինսկի կոնֆերանսի բոլոր կառույցները ենթակա են լուծարման
Մենք բազմիցս ասել ենք, որ Մինսկի խմբի ամերիկացի և ֆրանսիացի համանախագահների և ռուս համանախագահների միջև կապի դադարեցմամբ, և դա տեղի ունեցավ 2022 թվականի փետրվարին, ինչպես նաև Հայաստանի կողմից Պրահայում Հայաստան-Ադրբեջան-Եվրամիություն-Ֆրանսիա գագաթնաժողովի արդյունքում Ղարաբաղը որպես Ադրբեջանի Հանրապետության անբաժան մաս ճանաչելով (դա տեղի ունեցավ 2022-ի հոկտեմբերի 6-ին) ինչպես նաև գետնի վրա իրավիճակի արմատական փոփոխությամբ, իսկ դա 2023-ի աշնանն էր, ապա ԵԱՀԿ Մինսկի կոնֆերանսի համանախագահների հենց այս մանդատը կորցրել է իր արդիականությունը, որը հաստատվել է ԵԱՀԿ-ի կողմից։ Այս մասին այսօր՝ ապրիլի 17-ին, ճեպազրույցում ասել է ՌԴ ԱԳՆ պաշտոնական ներկայացուցիչ Մարիա Զախարովան։
Այսպես նա պատասխանեց ադրբեջանցի լրագրողի հետևյալ հարցին. «Հայաստանի վարչապետ Նիկոլ Փաշինյանը երեքշաբթի ելույթ ունենալով խորհրդարանում, կոչ արեց լուծարել ԵԱՀԿ Մինսկի խումբը՝ ադրբեջանական կողմի պահանջներին համապատասխան։ Ինչպե՞ս է Մոսկվան ընկալում Հայաստանի ղեկավարի պատրաստակամությունը, և էլ ի՞նչ, ըստ Ձեզ, պետք է հնարավորինս արագ անել խաղաղության պայմանագիր կնքելու համար»։
«Մենք բազմիցս քննարկել ենք այս թեման։
Ըստ այդմ, որպես հետևանք, Մինսկի կոնֆերանսի բոլոր կառույցները՝ Մինսկի խումբը, բարձր մակարդակի պլանավորման խումբը և Լեռնային Ղարաբաղի կարգավորման հարցով ԵԱՀԿ ներկայիս ներկայացուցչի անձնական ներկայացուցչի պաշտոնը, այս ամենը ենթակա է լուծարման։
Մենք կարծում ենք, որ համապատասխան որոշում կայացնելու օպտիմալ տարբերակը Բաքվի և Երևանի համատեղ առաջարկն է՝ լուծարել այդ հաստատությունները։
Մեր կողմից մենք մտադիր ենք շարունակել աջակցել մեր գործընկերներին խաղաղության պայմանագրի ստորագրման համար մնացած խոչընդոտները հաղթահարելու և տրանսպորտային և տնտեսական հաղորդակցությունների ապաշրջափակման, հայ-ադրբեջանական պետական սահմանի սահմանազատման, հումանիտար խնդիրների լուծման գործում.
Եվ, իհարկե, մենք միշտ հաստատում ենք մեր պատրաստակամությունը ռուսական հարթակ տրամադրել Ադրբեջանի և Հայաստանի ներկայացուցիչների միջև երկկողմ հարցերի ողջ սպեկտրի, այդ թվում՝ խաղաղության պայմանագրի կնքման շուրջ բանակցությունների համար», - ասել է Զախարովան։
News.am