Գարեգին Բ․ Ոգեկոչում ենք Ցեղասպանության տարելիցը` Արցախի կորուստների ցավը մեր սրտում

Ծիծեռնակաբերդում ոգեկոչվեց Հայոց ցեղասպանության 110-րդ տարելիցի զոհերի հիշատակը` արցախյան կորուստների ցավը սրտերում։ Այս մասին լրագրողների հետ զրույցում ասաց Ամենայն հայոց կաթողիկոս Գարեգին Երկրորդը։

Ավելի վաղ հայտնել էինք, որ կաթողիկոսը հոգևոր դասի ուղեկցությամբ այցելել է Ծիծեռնակաբերդ և աղոթք բարձրացրել առ Աստված։

«Այսօր ոգեկոչում ենք Հայոց ցեղասպանության 110-րդ տարելիցը` Արցախում մեր ժողովրդի հանդեպ իրագործված ցեղասպանական գործողությունների, արցախյան կորուստների ցավը մեր սրտում։ Ծիծեռնակաբերդի նվիրական այս բարձունքում մեր հոգևորականների և մեր զավակների հետ աղոթք բարձրացրինք առ Աստված, որ Տերը զորացնի մեր ժողովրդին` իր հոգու ցավն ու տառապանքը ուժի վերածելու, հաղթահարելու մեր կյանքում առկա դժվարությունները և նորանոր իրագործումներով շենացնելու հայրենական մեր երկիրը և կերտելու մեր ժողովրդի պայծառ ու լուսավոր կյանքը։ Թող Աստված օգնական ու պահապան լինի ազգիս` հայրենաշինության իր առաքելության նվիրական ճանապարհին»,– նշեց Ամենայն հայոց կաթողիկոսը։

Հիշեցնենք` 1915 թվականին տեղի ունեցած ոճրագործությունը, որի հետևանքով Օսմանյան կայսրությունում ավելի քան 1.5 մլն հայ է սպանվել, ХХ դարի առաջին ցեղասպանությունն է համարվում։ Թուրքիան ավանդաբար մերժում է ցեղասպանություն իրագործելու մեղադրանքներն ու անչափ ցավագին է ընդունում այդ հարցի վերաբերյալ քննադատությունները։

Հայոց ցեղասպանությունն առաջինը ճանաչել է Ուրուգվայը 1965 թվականին, այնուհետև նրա օրինակին են հետևել Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուելան, Արգենտինան, Բրազիլիան, Չիլին, Վատիկանը, Բոլիվիան, Չեխիան, Ավստրիան, Լյուքսեմբուրգը, ԱՄՆ–ն։

Sputnik Արմենիա