Իրանի և ԱՄՆ-ի բանակցությունների 4-րդ փուլը կարող է տեղի ունենալ մայիսի 3-ին Հռոմում
Իրանի և ԱՄՆ-ի միջև միջուկային ծրագրի շուրջ անուղղակի բանակցությունների չորրորդ փուլը կարող է տեղի ունենալ մայիսի 3-ին: Այս մասին հայտնում է Axios-ի լրագրող Բարաք Ռավիդը` հղում անելով իրավիճակին ծանոթ աղբյուրներին:
«ԱՄՆ-ի և Իրանի միջև բանակցությունների չորրորդ փուլի անցկացումը սպասվում Է Հռոմում շաբաթ օրը»,-հայտնել է լրագրողը X սոցցանցում:
Ապրիլի 12-ին Օմանի մայրաքաղաքում տեղի են ունեցել Մերձավոր Արևելքի հարցերով ԱՄՆ նախագահի հատուկ բանագնաց Սթիվեն Ուիտկոֆի և Իրանի արտգործնախարար Աբբաս Արաղչիի անուղղակի բանակցությունները: Ամերիկյան բանագնացի խոսքով՝ դրանք եղել են դրական և կառուցողական։ Իրանի արտգործնախարարը նույնպես կառուցողական է որակել բանակցությունները:
Իրանի և ԱՄՆ-ի միջև անուղղակի բանակցությունների երրորդ փուլը տեղի է ունեցել ապրիլի 26-ին Օմանում: Ամերիկյան պատվիրակությունը գլխավորում էր ԱՄՆ նախագահի Մերձավոր Արևելքի հարցերով հատուկ բանագնաց Սթիվ Ուիտկոֆը, իսկ իրանական պատվիրակությունը` ԱԳ նախարար Աբբաս Արաղչին:
Հիշեցնենք` 2015 թվականին Մեծ Բրիտանիան, Գերմանիան, Չինաստանը, Ռուսաստանը, ԱՄՆ-ը, Ֆրանսիան և Իրանը միջուկային գործարք կնքեցին, որը Իսլամական Հանրապետության միջուկային ծրագիրը սահմանափակելու դիմաց ենթադրում էր պատժամիջոցների վերացում: ԱՄՆ-ը Թրամփի նախորդ նախագահական ժամկետում ՝ 2018 թվականի մայիսին, դուրս եկավ համաձայնագրից և վերականգնեց պատժամիջոցները Թեհրանի ղեկավարության դեմ: Ի պատասխան՝ Իրանը հայտարարեց համաձայնագրի շրջանակներում իր պարտավորությունների փուլային կրճատման մասին՝ հրաժարվելով, մասնավորապես, միջուկային հետազոտությունների սահմանափակումներից և ուրանի հարստացման մակարդակից:
Sputnik Արմենիա