ԵԺԿ համագումարը Հայաստանի վերաբերյալ արտակարգ բանաձև ընդունեց
Եվրոպական ժողովրդական կուսակցությունը (ԵԺԿ) ապրիլի 29-30-ը Վալենսիայում անցկացված իր համագումարի ժամանակ Հայաստանի վերաբերյալ արտակարգ բանաձև է ընդունել։
Մասնավորապես, բանաձևում նշվում է, որ ԵԺԿ-ն բարձր է գնահատում Հայաստանում վերջին քաղաքական զարգացումները, դրանց թվում՝ վերջերս ընդունված օրենքի ընդունումը, որով մեկնարկում է Հայաստանի ԵՄ-ին անդամակցության գործընթացը։
«Այդ քայլը վերահաստատում է հայ ժողովրդի հանձնառությունը երկրում ժողովրդավարության և օրենքի գերակայության ամրապնդմանը և հարթում է հստակ ուղի դեպի ԵՄ-ի հետ ավելի խոր ինտեգրում: Ժողովրդավարության, օրենքի գերակայության և մարդու իրավունքների ոլորտներում շարունակական քաղաքական երկխոսությունը և բարեփոխումները մնում են կարևոր գործիքներ՝ Հայաստանի՝ ԵՄ-ին անդամակցելու ուղղությամբ առաջընթացի հասնելու համար՝ ապագա անդամակցության նպատակով: ԵԺԿ-ն հիշեցնում է, որ Հայաստանը պետք է պահպանի եվրոպական ամենաբարձր չափանիշները երկրի ներսում՝ հղում անելով ԵԺԿ-ի 2023 թվականի նոյեմբերի 13-14-ի քաղբանտարկյալներին աջակցության վերաբերյալ բանաձևին»,-ասած է բանաձևի տեքստում:
ԵԺԿ-ն Հայաստանին կոչ է արել շարունակել առաջընթացը Համապարփակ և ընդլայնված գործընկերության համաձայնագրի (CEPA) իրականացման ուղղությամբ, որը ներառում է ժողովրդավարական բարեփոխումների ոլորտում ձեռքբերումներ, ինչպես նաև ԵՄ անդամ պետությունների հետ ավելի սերտ համագործակցության ձգտում:
«Հավաքական անվտանգության պայմանագրի կազմակերպությանը (ՀԱՊԿ) Հայաստանի մասնակցության կասեցումը, որը հայտարարվել էր 2024 թվականի օգոստոսին, և վերջերս Եվրոպական ուղուն միանալու մասին օրինագծի ընդունումը նշանավորում են երկրի քաղաքականության, աշխարհաքաղաքական ռազմավարության պատմական տեղաշարժ և եվրոպական ինտեգրման գործընթացին հետագա մասնակցության հանձնառության հստակ նշաններ են։ Այդ շրջադարձային պահը արտացոլում է Հայաստանի պատրաստակամությունը՝ դուրս գալու Կրեմլի ազդեցությունից և ձգտելու եվրոպական արժեքների վրա հիմնված ապագայի», - ընդգծվում է բանաձևում։
ԵԺԿ-ն ճանաչում է այդ «հեռատես քայլերը, որոնք ուրվագծում են ինքնիշխան, անվտանգ և ժողովրդավարական ապագա՝ անկախ նախկին կայսերական կախվածություններից»։
«Մենք լիովին աջակցում ենք մեր տնտեսական և առևտրային հարաբերությունների ընդլայնման ջանքերին՝ հաշվի առնելով Հայաստանի կախվածության նվազումը Եվրասիական տնտեսական միությունից (ԵԱՏՄ), և բարձր ենք գնահատում ԵՄ քաղաքացիական առաքելության մանդատի (EUMA) երկարաձգումը Հայաստանում՝ որպես երկրում խաղաղության և անվտանգության ապահովման միջնորդ»,-ասված է փաստաթղթում։
Ըստ բանաձևի՝ ԵԺԿ-ն նաև ողջունում է ԵՄ-ի և Հայաստանի միջև վիզային ռեժիմի ազատականացման շուրջ երկխոսության մեկնարկը՝ որպես երկրի ԵՄ-ին ինտեգրման հաջորդ քայլ, որն անմիջականորեն բարելավում է երկու կողմերի միջև մարդկանց միջև շփումները։
ԵԺԿ-ն ողջունում է Եվրոպական խաղաղության հիմնադրամի միջոցով Հայաստանին աջակցելու որոշումը և կոչ է անում ԵՄ անդամ պետություններին շարունակել այդ աջակցությունը։
Բանաձևում նաև հիշատակվում են հարևան երկրների հետ Հայաստանի հարաբերությունները։
«ԵԺԿ-ն ողջունում է Հայաստանի կառավարության վերջին ջանքերը՝ հարևանների հետ հարաբերությունները կարգավորելու համար։ Հայաստանը շարունակում է ցուցաբերել կառուցողական և հեռատես մոտեցում՝ Թուրքիայի հետ կառուցողական երկխոսության մեջ մտնելով՝ երկու երկրների միջև հարաբերությունները առանց նախապայմանների լիովին կարգավորելու նպատակով։ Հայաստանը նաև շարունակում է ներգրավված լինել Ադրբեջանի հետ շարունակական խաղաղության բանակցություններում՝ չնայած 2023 թվականի ռազմական հարձակման և Լեռնային Ղարաբաղի հայ բնակչության բռնի տեղահանման հետևանքով առաջացած խնդիրներին։
ԵԺԿ-ն հիշեցնում է մնացած ռազմագերիների անհապաղ և անվերապահ ազատ արձակման անհրաժեշտության մասին և հիշեցնում է էթնիկ հայերի՝ Լեռնային Ղարաբաղ վերադառնալու երաշխավորված իրավունքի մասին։ Այդ քայլերն արտացոլում են Հարավային Կովկասում խաղաղության, կայունության և համագործակցության նկատմամբ իրական հանձնառությունը։ Քաղբանտարկյալների ազատ արձակումը և տարածաշրջանում մշակութային, կրոնական և քաղաքացիական իրավունքների հուսալի երաշխիքների ստեղծումը կդիտարկվեն որպես երկխոսության բնական հաջորդ քայլ, որը նաև կծառայի որպես երկրների միջև համագործակցության երկարաժամկետ խորացման անկյունաքար։
Սակայն կայուն առաջընթացը կախված կլինի փոխադարձ բարի կամքից և բոլոր երկրների անկեղծ ու կառուցողական երկխոսության մեջ ներգրավվելու պատրաստակամությունից։ ԵԺԿ-ն նաև ողջունում է «Խաղաղության խաչմերուկ» նախագիծը, որը հավակնոտ նախաձեռնություն է, որի նպատակն է Հայաստանը դարձնել տարածաշրջանային կապի, տնտեսական աճի և խաղաղ համագործակցության կենտրոն։ Մերձեցնելով Արևելքն ու Արևմուտքը, Հյուսիսն ու Հարավը՝ նախագիծը ամրապնդում է Հայաստանի ռազմավարական արժեքը որպես ԵՄ կայուն գործընկեր և համարվում է տարածաշրջանում լարվածության թուլացմանը նպաստող գործոն», - ասված է բանաձևում։
News.am