Ուկրաինան և ԱՄՆ-ն ստորագրել են ընդերքի վերաբերյալ համաձայնագիրը
Կիևը և Վաշինգտոնը համաձայնագիր են ստորագրել համատեղ հանքարդյունաբերության և Ուկրաինայի վերականգնման համար ներդրումային հիմնադրամի ստեղծման մասին, հաղորդում է ԱՄՆ ֆինանսների նախարարությունը։
ԱՄՆ ֆինանսների նախարարության կայքում հրապարակված մամուլի հաղորդագրության մեջ ասվում է, որ համաձայնագիրը կնքվել է «ի նշան այն նշանակալի ֆինանսական և նյութական աջակցության, որը ամերիկացի ժողովուրդը տրամադրել է Ուկրաինայի պաշտպանությանը Ռուսաստանի լայնածավալ ներխուժման սկզբից ի վեր»։
«Այս տնտեսական համագործակցությունը թույլ է տալիս երկու երկրներին համատեղ աշխատել՝ ապահովելու համար, որ մեր համատեղ ակտիվները, տաղանդը և կարողությունները արագացնեն Ուկրաինայի տնտեսական վերականգնումը», - հայտարարել է ԱՄՆ ֆինանսների նախարարությունը։
Միաժամանակ, Ֆինանսների նախարարությունը պարզաբանում է, որ կողմերը կաշխատեն «ծրագրի կառավարման եղանակի վերջնական հաստատման և այս կարևոր գործընկերության զարգացման» ուղղությամբ։
«Ինչպես նախագահ [Դոնալդ Թրամփը] ասել է, Միացյալ Նահանգները հանձնառու է օգնելու վերջ դնել այս դաժան և անիմաստ պատերազմին», - ասել է ֆինանսների նախարար Սքոթ Բեսենթը։ «Այս համաձայնագիրը հստակ ազդանշան է Ռուսաստանին, որ Թրամփի վարչակազմը հանձնառու է խաղաղության գործընթացին, որի կենտրոնում երկարաժամկետ հեռանկարում կլինի ազատ, ինքնիշխան և բարգավաճ Ուկրաինան»։
Փաստաթղթի ստորագրման մասին զեկուցել է նաև Վաշինգտոնում գտնվող Ուկրաինայի էկոնոմիկայի նախարար Յուլիա Սվիրիդենկոն։
«ԱՄՆ ֆինանսների նախարար Սքոթ Բեսենթի հետ միասին ես ստորագրեցի ԱՄՆ-Ուկրաինա վերականգնման ներդրումային հիմնադրամ ստեղծելու համաձայնագիր։ Շնորհակալություն նախագահներին ձեր առաջնորդության համար։ Շնորհակալություն բոլոր նրանց, ովքեր աշխատել են համաձայնագրի համար և այն ավելի իմաստալից են դարձրել։ «Այս փաստաթուղթը կարող է ապահովել մեր երկու երկրների հաջողությունը», - գրել է նա Ֆեյսբուքում։
Նա հավելել է, որ համաձայնագիրը պետք է վավերացվի Ուկրաինայի Գերագույն ռադայի կողմից։
News.am