Ինչ փուլում է Լևոն Քոչարյանի այն գործը, որի շրջանակներում վերջինս ունի տուժողի կարգավիճակ. Փաստաբանը՝ ՔԿ նախագահին

Դիմել եմ ՀՀ գլխավոր դատավազին և ՀՀ քննչական կոմիտեի նախագահին պարզաբանելու համար թե ինչ փուլում է գտնվում ՀՀ ԱԺ պատգամավոր Լևոն Քոչարյանի այն գործը, որի շրջանակներում վերջինս ունի տուժողի կարգավիճակ։ Այս մասին հայտարարել է փաստաբան Էրիկ Ալեքսանյանը։

Նա, մասնավորապես, նշել է. «Հանրության աչքի առաջ է եղել, թե ինչպես են ոստիկանները բռնության ենթարկում Լևոն Քոչարյանին, ընդ որում՝ քննության ընթացքում անձինք են հարցաքննվել, որոնք հաստատել են այդ փաստը, իսկ Լևոն Քոչարյանի մարմնի վրա բռնության հետքերի և մարմնական վնասվածքների առկայությունը հաստատվել է նաև դատաբժշկական փորձաքննությամբ, սակայն 2024 թվականի սեպտեմբեր ամսից մինչ օրս ոստիկանները պատասխանատվության չեն ենթարկվել։

Ընդ որում՝ ՀՀ քննչական կոմիտեի նախագահը ԱԺ նիստի ժամանակ հայտնել է, որ նմանատիպ գործերի դեպքում գործուն քայլեր անելու համար կարևոր նշանակություն ունի հենց դատաբժշկական եզրակացությունը, որը Լևոն Քոչարյանի դեպքում առկա է, մինչդեռ ակնհայտ է, որ այս մոտեցումն անտեսվում է պատգամավորի գործի դեպքում և զավեշտալի ձևով փորձ է կատարվում ներկայացնել իրողությունն այնպես, թե իբր Լևոն Քոչարյանի մարմնի վրա առկա բռնի հետքերն առաջացել են ինքնավնասման պայմաններում։

Հ.Գ. Քրեական վարույթը նախաձեռնվել է խոշտանգման հատկանիշներով, որն ի դեպ վաղեմություն չունի, հետևաբար վաղ թե ուշ ոստիկաններին պատասխանատվության կանչելը անխուսափելի է»։

News.am