Թրամփը հաստատել է, որ ԱՄՆ-ն Իրանին է փոխանցել միջուկային գործարքի առաջարկը

ԱՄՆ նախագահ Դոնալդ Թրամփը հաստատել է, որ Միացյալ Նահանգները Իրանին է փոխանցել միջուկային նոր գործարքի առաջարկը:

Ավելի վաղ Axios պորտալը, վկայակոչելով ամերիկացի պաշտոնյային, հայտնել էր, որ Թրամփի վարչակազմը միջուկային գործարքի վերաբերյալ առաջարկն Իրանին է փոխանցել բանակցությունների չորրորդ փուլի ընթացքում:

«Այդ առաջարկը նրանց մոտ է», - ասել է ԱՄՆ նախագահը՝ օդանավում կայացած ճեպազրույցի ընթացքում պատասխանելով լրագրողի համապատասխան հարցին:

Անցած շաբաթ կայացել է իրանական միջուկային ծրագրի և Թեհրանի նկատմամբ պատժամիջոցների չեղարկման վերաբերյալ Իրանի և ԱՄՆ-ի բանակցությունների չորրորդ փուլը։ Այն տեղի է ունեցել կողմերի երկխոսության մեկնարկից մեկ ամիս անց՝ երրորդ փուլից երկու շաբաթ հետո։

Թեհրանի և Վաշինգտոնի միջև անուղղակի բանակցությունների առաջին և երրորդ փուլերը տեղի են ունեցել Օմանում՝ համապատասխանաբար ապրիլի 12-ին և 26-ին, երկրորդը՝ Հռոմում՝ ապրիլի 19-ին:

2015 թվականին Մեծ Բրիտանիայի, Գերմանիայի, Չինաստանի, Ռուսաստանի, ԱՄՆ-ի, Ֆրանսիայի և Իրանի միջև կնքված միջուկային գործարքը ենթադրում էր Իրանի միջուկային ծրագիրը սահմանափակելու դիմաց պատժամիջոցների վերացում: ԱՄՆ-ն Թրամփի նախորդ նախագահական ժամկետում՝ 2018 թվականի մայիսին, դուրս եկավ համաձայնագրից և վերականգնեց Թեհրանի դեմ պատժամիջոցները: Ի պատասխան՝ Իրանը հայտարարեց համաձայնագրի շրջանակներում իր պարտավորությունների փուլային կրճատման մասին՝ հրաժարվելով, մասնավորապես, միջուկային հետազոտությունների սահմանափակումներից և ուրանի հարստացման մակարդակից:

Sputnik Արմենիա