Ֆրանսիան հաստատակամ աջակցում է հայ-ադրբեջանական խաղաղ գործընթացին. Մակրոնը` Փաշինյանին

Ֆրանսիայի նախագահ Էմանուել Մակրոնը Տիրանայում ՀՀ վարչապետ Նիկոլ Փաշինյանի հետ հանդիպման ժամանակ ընդգծել է Ֆրանսիայի հաստատակամ աջակցությունը հայ-ադրբեջանական խաղաղ գործընթացին։

«Կայունությունն ու անվտանգությունը Հարավային Կովկասում կենսական նշանակություն ունեն ընդհանուր տարածաշրջանային համագործակցության համար»,–նշել է Մակրոնը։

Հանդիպման ընթացքում կարևորվել է Հայաստան-Ադրբեջան խաղաղության համաձայնագրի ստորագրումը և այդ ուղղությամբ շարունակական և հետևողական քայլերի իրականացումը:

Զրուցակիցները բարձր են գնահատել Հայաստան-Ֆրանսիա հարաբերությունների դինամիկ զարգացումը՝ ընդգծելով, որ բարձր մակարդակի շփումները և կառուցողական քաղաքական երկխոսությունը նպաստում են փոխադարձ հետաքրքրություն ներկայացնող ոլորտներում համագործակցության ընդլայնմանը:

Կողմերը քննարկել են երկկողմ հարաբերությունների օրակարգային մի շարք հարցեր, ինչպես նաև անդրադարձել տարածաշրջանային և միջազգային զարգացումներին:

Ավելի վաղ Եվրոպական քաղաքական համայնքի 6-րդ գագաթնաժողովի շրջանակներում Ֆրանսիայի նախագահ Էմանուել Մակրոնը հանդես էր եկել հայտարարությամբ, որում նշել էր, որ Ֆրանսիան աջակցում է Հայաստանի և Ադրբեջանի ջանքերին՝ վերջնական խաղաղության հասնելու և խաղաղության համաձայնագիր ստորագրելու համար:

Ավելի վաղ հայտնել էինք, որ Տիրանայում Փաշինյանն ու Ալիևը զրույց են ունեցել։ Ավելի ուշ Նիկոլ Փաշինյանը տեղեկացրեց, որ Ալիևի հետ քննարկել է Երևանի և Բաքվի միջև հարաբերությունների կարգավորման գործընթացը:

Հիշեցնենք` մայիսի 15–ին ՀՀ վարչապետ Նիկոլ Փաշինյանն աշխատանքային այցով մեկնել է Ալբանիա` մասնակցելու Եվրոպական քաղաքական համայնքի 6-րդ գագաթնաժողովին։

Sputnik Արմենիա