Իրանը չի բացառում ԱՄՆ-ի հետ փոխզիջումները, բայց չի հրաժարվի խաղաղ ատոմից

Թեհրանը չի բացառում Վաշինգտոնի հետ բանակցություններում փոխզիջումների հասնելու հնարավորությունը, սակայն գործընթացը կարող է վտանգվել, եթե ԱՄՆ-ն փորձի Իրանին զրկել խաղաղ ատոմային էներգիայի իրավունքից։ Այս մասին հայտարարել է ԱԳՆ պաշտոնական ներկայացուցիչ Իսմայիլ Բաղային:

Նրա խոսքով՝ բանակցություններում կողմերի միջև «ըմբռնման որոշակի մակարդակ» է նկատվում այն հարցում, որ Իրանը «ոչ մի պարագայում չի հրաժարվի խաղաղ ատոմային էներգիայի իրավունքից»:

Բացի այդ, Բաղային դրական է համարում Իրանի և ԱՄՆ-ի միջև համաձայնության հասնելու հնարավորությունները:

«Եթե մտադրությունն այն է, որ համոզվենք` Իրանի միջուկային ծրագիրը զենք չի դառնա, կարծում եմ՝ դա մենք հեշտությամբ կարող ենք անել... Եթե ԱՄՆ-ի մտադրությունը իրանցիներին խաղաղ ատոմային էներգիայի իրավունքից զրկելն է՝ կարծում եմ, որ շատ խնդրահարույց կլինի և կվտանգի ողջ գործընթացը», - CNN հեռուստաալիքին ասել է Բաղային։

Պատասխանելով հարցին, թե ինչպես կարելի է բանակցություններում հասնել փոխզիջման, Իրանի ԱԳՆ ներկայացուցիչը հայտարարել է, որ դրան կարելի է հասնել «շատ միջոցներով»՝ չհստակեցնելով, սակայն, թե կոնկրետ ինչ նկատի ունի:

Ավելի վաղ՝ մայիսի 25-ին, ԱՄՆ-ի՝ Իրանին ուրանի հարստացումից հրաժարվելու պահանջների լույսի ներքո ԻԻՀ ԱԳ նախարար Աբբաս Արաղչին հայտարարել է, որ այդ հարցով Թեհրանը փոխզիջման չի գնա, սակայն կարող է ԱՄՆ-ի հետ վստահության ստեղծման նպատակով ճշգրտել ուրանի հարստացման մակարդակը։ Նա հավելել է, որ Թեհրանի կողմից ուրանի հարստացման բուն փաստը խոսակցության առարկա չի կարող լինել՝ Իրանը շարունակելու է հարստացումը։

Թեհրանը և Վաշինգտոնն իրանական միջուկային դոսյեի շուրջ Օմանի միջնորդությամբ անցկացրել են անուղղակի բանակցությունների 5 փուլ։ Դրանցից վերջինը տեղի է ունեցել մայիսի 23-ին Հռոմում։

Sputnik Արմենիա