ՀՀ-ՌԴ կապերի պատմությունը վերաիմաստավորելու փորձեր են արվում. դեսպանը լուծում է առաջարկում
Հայաստանում Ռուսաստանի դեսպան Սերգեյ Կոպիրկինը հայտարարել է, որ այսօր նկատվում են Հայաստանի պատմության, ինքնության և հայ-ռուսական կապերի պատմության վերաիմաստավորման փորձեր: Այս մասին դիվանագետն ասել է Երևանում ակադեմիկոս Մառի անվան հայագիտության մրցույթի հաղթողների պարգևատրման արարողության ժամանակ:
Նրա խոսքով՝ այդ փորձերն անմիջական կապ ունեն այն ամենի հետ, ինչ տեղի է ունենում երկկողմ հարաբերություններում, տարածաշրջանում և աշխարհում: Խնդրի լուծման բանալին նա համարում է Հայաստանի, հայ ազգի և պատմության օբյեկտիվ, դրական և գիտական վերլուծությունը։
Դիվանագետի խոսքով` երկու երկրներին շատ բան է միավորում, Հայաստանի և Ռուսաստանի ինքնություններն այնքան սերտորեն են միահյուսված, որ երբեմն դժվար է տարանջատել դրանց պատմական և հոգևոր արմատները:
Նրա կարծիքով՝ կարևոր է նաև, որ հայագիտությունն այժմ մեծ պահանջարկ ունի Ռուսաստանում։ Համապատասխան ամբիոն է ստեղծվում է Մոսկվայի պետական համալսարանի Ասիայի և Աֆրիկայի երկրների ինստիտուտում: Պետք է ամեն կերպ աջակցել այս գործընթացներին։ Հարցն արդիական է նաև Ռուսաստանի դեսպանատան համար։ Կոպիրկինը ցանկանում է, որ ամեն տարի աշխատանքի գան հայերենին տիրապետող դիվանագետներ։
Sputnik Արմենիա