Գագիկ Ծառուկյան․ Պետք է վերականգնել եղբայրական հարաբերությունները Ռուսաստանի հետ

Հայաստանի համար չափազանց կարևոր է բարձրացնել իր մասնակցության աստիճանն այնպիսի միջոցառումներին, ինչպիսին է Սանկտ Պետերբուրգի միջազգային տնտեսական համաժողովը։ Այդ մասին ասել է գործարար, «Բարգավաճ Հայաստան» կուսակցության հիմնադիր Գագիկ Ծառուկյանը Sputnik–ի հետ զրույցում` խոսելով միջազգային տնտեսական ֆորումի, ինչպես նաև այն մասին, թե ինչու պետք է Հայաստանը հրաժարվի եվրոպական ուղեգծից և մնա ԵԱՏՄ–ում:

«Հայաստանը պարտադիր պետք է ամեն տարի պետք է մասնակցի միջազգային տնտեսական այս համաժողովին. մասնակից ներդրողների ու գործարարների հսկայական թիվը ցույց է տալիս, որ ամենատարբեր ոլորտներում հնարավորությունները շատ են։ Համոզված եմ` նման խոշոր համաժողովներին մասնակցությունը Հայաստանին շատ ու շատ բան կտա»,– նշել է գործարարը։

Նրա խոսքով՝ դա նաև կարող է նպաստել Ռուսաստանի հետ Հայաստանի եղբայրական հարաբերությունների վերականգնմանը։

«Ինչպես երկրի տնտեսության զարգացմանը, այնպես էլ բնակչության բարգավաճման և անվտանգության ապահովման հարցերում դա շատ բան կտա Հայաստանին։ Դարեր շարունակ մեր ժողովուրդները բարեկամություն են արել և ապրել միասին»,– ասել է բարերարը։

Նրա խոսքով` հայ երիտասարդների շրջանում դա, ցավոք, քչերն են լիարժեք գիտակցում:

«Երիտասարդներին պետք է այդ ամենի մասին պատմել, թե որքան շատ բան է անում Ռուսաստանը Հայաստանի համար։ Բոլոր խոշոր երկրներն այժմ ցանկանում են կարգավորել իրենց հարաբերությունները Ռուսաստանի հետ, իսկ պաշտոնական Երևանը փչացնում է դրանք։ Դա անթույլատրելի է. հարաբերությունները պետք է վերականգնել»,– վստահ է «Բարգավաճ Հայաստանի» հիմնադիրը։

Ծառուկյանի համոզմամբ` ԵՄ–ի և ԵԱՏՄ–ի միջև ընտրությունը Հայաստանի համար պետք է ակնհայտ լինի. Հայաստանը պետք է ոչ միայն մնա ԵԱՏՄ կազմում, այլև խորացնի ինտեգրումը «հնգյակի» երկրների հետ:

«Մեր ամբողջ արտադրությունն ուղղված է ԵԱՏՄ, մեծ մասամբ՝ ռուսական շուկային։ Վերջինը եղել է դարեր շարունակ և շարունակում է աշխատել մինչ օրս: Նույն մակարդակի վրա Արևմուտքի հետ նման շուկա կառուցել չի ստացվի»,– ընդգծել է նա։

«Բարգավաճ Հայաստանի» հիմնադիրը խոսել է նաև Ռուսաստանի հետ ընդհանուր պատմական հիշողության պահպանման կարևորության մասին: Մասնավորապես, նա խոսել է Հայրենական մեծ պատերազմում տարած հաղթանակի մասին։

«Մոտ 600 հազար հայ մասնակցել է Հայրենական մեծ պատերազմին, 300 հազարը տուն չվերադարձավ։ Նրանք ԽՍՀՄ հերոսներ են` մարշալներ, ծովակալներ, գեներալներ և հսկայական թվով զինվորներ ու սպաներ. նրանք հայեր են, որոնք Խորհրդային Միության մյուս ժողովուրդների հետ վճռական ներդրում են ունեցել Հաղթանակի հասնելու գործում։ Մենք պարտավոր ենք հիշել նրանց սխրանքը, հպարտանալ նրանցով և դրանց մասին պատմել մեր երիտասարդներին»,– կարծում է Գագիկ Ծառուկյանը։

Նա հիշեցրել է, որ իր ղեկավարած կուսակցությունը հաղթանակի տարեդարձի առթիվ մի շարք միջոցառումներ է կազմակերպել Հայաստանում:

«Խոսքը վերաբերում է վետերաններին օգնելուն, հեռուստատեսությամբ թեմատիկ ծրագրերին, Հովհաննես Բաղրամյանի Մարտական փառքի թանգարանի բացմանը, նկարների ցուցադրությանը, կոլեկցիոն կոնյակի թողարկմանը, դրամաշնորհների տրամադրմանը, շքերթներին և այլն»,– եզրափակել է նա:

Հիշեցնենք` Սանկտ Պետերբուրգի միջազգային տնտեսական համաժողովն անցկացվում է հունիսի 18-21-ը։ ՌԻԱ Նովոստին միջոցառման տեղեկատվական գործընկերն է։

Sputnik Արմենիա