Փաշինյան․ Մենք Թուրքիայի հետ հարաբերություններն սկսել ենք զրոյական կետից
Ըստ էության, մենք Թուրքիայի հետ հարաբերությունները սկսել ենք զրոյական կետից, ըստ էության, սա նոր հարաբերություններ հաստատելու հնարավորություն է, և սա մեր երկրների շահերից է բխում։ Այս մասին Էրդողանի հետ հանդիպումից առաջ Թուրքիայի հայ համայնքի հետ հանդիպման ժամանակ հայտնել է Հայաստանի վարչապետ Նիկոլ Փաշինյանը։
«2021-2022թթ. քննարկման արդյունքում մենք եկանք հետևյալ եզրակացության. եթե մենք ստանձնենք այս օրակարգը, պետք է հավատանք, որ դա հնարավոր է և իրագործելի, հակառակ դեպքում կստացվի, որ մենք խաբում ենք ինքներս մեզ, սխալ ուղերձ ենք հղում մեր հանրությանը, սխալ ուղերձ ենք հղում մեր միջազգային գործընկերներին, սխալ ուղերձ ենք հղում Թուրքիային, և սա արդեն շատ վատ սկիզբ է։ Ուստի մենք պետք է հավատանք այն բանին, որ դա իրականանալի խնդիր է»,- ավելացրել է նա։
Նրա խոսքով՝ ներկա քննարկումն իրականում սկսվել է 2022թ. Պրահայում Թուրքիայի նախագահ Էրդողանի հետ առաջին հանդիպումից, որից հետո Հայաստանի և Թուրքիայի միջև սկսվել է հատուկ ներկայացուցիչների երկխոսություն, ապա ակտիվ շփումներ են սկսվել արտաքին գործերի նախարարների միջև։
«Անցյալ տարի Նյու Յորքում ես հանդիպում ունեցա Թուրքիայի նախագահի հետ։ Այս ընթացքում մենք մի քանի հեռախոսազրույցներ ունեցանք, և, իհարկե, սա շատ կարևոր հանգրվան է։
Ի՞նչ է փոխվել Հայաստանի և Թուրքիայի միջև հարաբերություններում։
Շատ էական բան, քանի որ մի քանի տարի առաջ, եթե մենք անհրաժեշտություն ունեինք պարզաբանելու Թուրքիայի դիրքորոշումը այս կամ այն հարցի վերաբերյալ, կամ եթե Թուրքիան ցանկանում էր պարզաբանել Հայաստանի դիրքորոշումը այս կամ այն հարցի վերաբերյալ, երկու կողմերն էլ պետք է փորձեին դա անել երրորդ երկրների միջոցով։
Ես կարևոր եմ համարում, որ մենք բավական երկար ժամանակ ուղիղ շփումներ ենք ունեցել Թուրքիայի հետ, և սա անհրաժեշտ և կարևոր պայման է, որպեսզի մենք փորձենք ձևավորել որոշակի օրակարգեր և քննարկումներ անցկացնել։ Ես նկատի չունեմ միայն այն հանդիպումները, որոնք անցկացվում են երկկողմ մակարդակով։ Ի տարբերություն նախորդ ժամանակահատվածի, մեր շփումները Թուրքիայի հետ այժմ շատ ինտենսիվ են։
«Մեր քննարկումները որոշակի ազդեցություն կունենան հետագա իրադարձությունների զարգացման վրա և նոր թափ կհաղորդեն հայ-թուրքական հարաբերություններին։
Մենք պարտավոր ենք այս հարաբերությունները ձևակերպել որպես Հայաստանի և Թուրքիայի միջև միջպետական հարաբերություններ, թեև հանրային ոլորտում մենք շարունակում ենք խոսել հայ-թուրքական հարաբերությունների մասին»,- նշել է Փաշինյանը։
News.am