Բագրատ սրբազանին բերման ենթարկեցին (ՏԵՍԱՆՅՈՒԹ)
«Սրբազան շարժման» առաջնորդ Բագրատ սրբազանին բերման ենթարկեցին։ Sputnik Արմենիայի կադրերում երևում է, թե ինչպես է նա դիմակավորված անձանց ուղեկցությամբ դուրս գալիս իր կեցավայրից։
«Չարի՛ք, լավ լսիր` ինչ էլ որ սարքես, քեզ շատ քիչ ժամանակ է մնացել, դիմացի՛ր, կգա՛նք»,–իրավապահների մեքենան նստելուց առաջ ասաց սրբազանը։
Հավաքվածները սկսեցին վանկարկել. «Նիկոլ, դավաճա՛ն»։
Հիշեցնենք` ՀՀ վարչապետ Նիկոլ Փաշինյանը հունիսի 24-ին ֆեյսբուքյան իր էջում տարածեց իշխանական կայքի մի հրապարակում, ըստ որի` իբր ընդդիմադիրները պետական հեղաշրջում են նախաձեռնել։ Այդ «բացառիկ թղթերում» արծարծվում էր նաև Բագրատ սրբազանի անունը։
Այսօր առավոտյան հայտնի դարձավ, որ զանգվածային խուզարկություններ են սկսվել «Սրբազան պայքար» շարժման աջակիցների տներում, խուզարկություններ են իրականացվում նաև ՀՅԴ Հայաստանի գերագույն մարմնի անդամ Իգոր Սարգսյանի ՀՅԴ Աբովյանի կոմիտեի անդամ Վարդան Ավագյանի, Հրազդանի կոմիտեի անդամ Արտաշես Հունանյանի, Նոյեմբերյանի կոմիտեի անդամ Վարազդատ Ամիրաղյանի և «Հայաստան» խմբակցության պատգամավոր Արթուր Սարգսյանի տներում։
Խուզարկություններ են իրականացվում նաև Էջմիածնի` ընդդիմադիր հայացքներ ունեցող բնակիչների տներում։ Խուզարկությունների ենթարկվածների թվում են «Էջմիածին» խմբակցության անդամ Էդգար Թամազյանը, ինչպես նաև Արթուր Մակարյանը, Արսեն Քազարյանը, Արմեն Ալեքսանյանը։
ՀՀ քննչական կոմիտեն հայտարարեց, որ «Սրբազան պայքար» շարժման մասնակիցները և ղեկավարները պլանավորել էին ՀՀ-ում իրականացնել ահաբեկչական և իշխանությունը զավթելուն ուղղված գործողություններ։