ԱՊՀ-ում մեկնաբանել են Տնտեսական խորհրդի նիստին մասնակցելուց Ադրբեջանի հրաժարվելը

ԱՊՀ գլխավոր քարտուղար Սերգեյ Լեբեդևը հույս է հայտնել, որ Համագործակցության Տնտեսական խորհրդի նիստին, որն անցկացվում է հուլիսի 18-ին Մոսկվայում, Ադրբեջանի ներկայացուցիչների բացակայությունը ժամանակավոր դրվագ է, և իրավիճակը շուտով կվերադառնա նախկին հունին։

«Մենք որևէ բացասական արտահայտություն չենք ստացել։ Այսօր, ճիշտն ասած, պետք է խոստովանեմ, ադրբեջանական պատվիրակությունը չի ժամանել, բայց մենք չգիտենք նրա չժամանելու պատճառները։ Նրանք մեզ չեն տեղեկացրել, բայց ես մեծ հույս ունեմ, որ իրավիճակը կվերադառնա նախկին հունին, և Ադրբեջանը եղել է և կմնա ինտեգրացիոն համագործակցության ակտիվ մասնակիցը։ Համենայն դեպս, մեզ այդ մասին հավաստիացրել են և՛ Ադրբեջանի նախագահը, և՛ վարչապետը։ Մենք կարծում ենք, որ սա այսպիսի ժամանակավոր դրվագ է, և ժամանակի ընթացքում ամեն ինչ կկարգավորվի։ Սա մեր անկեղծ հույսն է»,- ասել է Լեբեդևը ТАСС-ին։

Հուլիսի 18-ի առավոտյան ադրբեջանական լրատվամիջոցներում տեղեկություն է հայտնվել, որ Ադրբեջանի պատվիրակությունը չի մասնակցում Մոսկվայում ընթացող ԱՊՀ Տնտեսական խորհրդի նիստին։ Ադրբեջանի նախարարների կաբինետի մամուլի ծառայությունից հայտնել են, որ նման տեղեկատվության չեն տիրապետում։ Նիստի մասնակիցների ցուցակներում Ադրբեջանի ներկայացուցիչները հայտարարագրված չեն եղել։

News.am