Քննարկվում է զբոսաշրջային ոլորտում ապահովագրական համակարգի ներդրման հարցը

ՀՀ էկոնոմիկայի նախարարության Զբոսաշրջության կոմիտեն ուսումնասիրում է միջազգային փորձը՝ զբոսաշրջային ընկերությունների կողմից պարտավորությունները քաղաքացիների նկատմամբ չկատարելու խնդիրները բացառելու նպատակով:

Կառավարության նիստում Էկոնոմիկայի նախարար Տիգրան Խաչատրյանն անդրադառնալով Եգիպտոսում մնացած ՀՀ քաղաքացիների խնդրին՝ նշեց, որ զբոսաշրջային կազմակերպության չկատարված պարտավորությունները քաղաքացիների նկատմամբ այն պատճառով են, որ Հայաստանում գործում են բավականին ազատական իրավակարգավորումներ այս ոլորտում:

«Զբոսաշրջության կոմիտեն այժմ ուսումնասիրում է միջազգային փորձը՝ հասկանալու համար, թե ինչպիսի օպտիմալ որոշումներ կարող են կայացվել ՀՀ-ի դեպքում: Ճիշտ եղանակը նման գործունեությամբ զբաղվող ընկերություններին իրենց ստանձնած քաղաքացիաիրավական պարտավորությունների առնչությամբ ապահովագրության պահանջի ներկայացումն է: Սա պետք է լինի ապահովագրության մեխանիզմների ճիշտ նախագծման և ներդրման միջոցով: Մենք նաև պետք է աշխատենք ապահովագրական ընկերությունների հետ, որ դա թանկ չլինի մեր քաղաքացիների համար, բայց նրանք երաշխավորված կլինեն, որ նման իրավիճակներում այլևս չեն հայտնվի»,- «Արմենպրես»-ի փոխանցմամբ, ասաց Տիգրան Խաչատրյանը:

Ոստիկանապետ Վալերիյ Օսիպյանն էլ տեղեկացրեց, որ պարտավորությունները չկատարած տուրիստական ընկերության նկատմամբ քրեական գործ է հարուցվել, նախապատրաստվում են համապատասխան նյութեր:

Կառավարությունն օգոստոսի 1-ի նիստում որոշում կայացրեց գրեթե 6 մլն դրամ հատկացնել «Տարոն ավիա» ավիաընկերությանը՝ Հուրգադայում մնացած ՀՀ 109 քաղաքացիներին Հայաստան վերադարձնելու նպատակով: