ՌԴ-ն հուսով է, որ հայ-ադրբեջանական սահմանագոտու իրավիճակը կկարգավորվի

ՌԴ-ն հուսով է, որ Հայաստանի և Ադրբեջանի սահմանին իրավիճակը կկարգավորվի հնարավորինս արագ, և այս հակամարտության շուրջ զգայական ֆոնը կվերադառնա նորմալ հուն: Այս մասին երկուշաբթի հայտարարել է ՌԴ նախագահի մամուլի քարտուղար Դմիտրի Պեսկովը՝ մեկնաբանելով տեղեկությունները Մոսկվայում առևտրի վրա այս հակամարտության ազդեցության մասին, փոխանցում է ՏԱՍՍ-ը:

Կրեմլի ներկայացուցիչը շեշտել է, որ թե՛ հայերը, թե՛ ադրբեջանցիները, որոնք ՌԴ քաղաքացիություն ունեն, ռուսաստանյան հանրության հարգարժան անդամներն են, բայց ակնհայտ է, որ հայ-ադրբեջանական սահմանին էսկալացիան չի կարող այս [ռուսաստանցի] քաղաքացիներին անտարբեր թողնել:

«Մենք հույս ունենք, որ իրավիճակը որքան հնարավոր է արագ կկարգավորվի, և այսպիսով զգայական ֆոնը կվերադառնա նորմալ հուն»,- շեշտել է Պեսկովը: