Կարեն ՎՐԹԱՆԵՍՅԱՆ. ՀԱԶԱՐԱՎՈՐ ՎԱՐԱԿՈՒՄՆԵՐԻՑ ԿԱՐՈՂ ԷԻՆՔ ԽՈՒՍԱՓԵԼ
Փորձագետ Կարեն Վրթանեսյանն իր ֆեյսբուքյան էջում գրում է.
«Երեկվա դրությամբ Հայաստանում գրանցված էր նոր կորոնավիրուսով 40 794 վարակված, որոնցից 1040-ը մահացել են։
Վրաստանում՝ 1319 վարակակիր, որոնցից 17-ն է մահացել։ Իսկ հիմա ուշադրություն... Հայաստանում այս ամբողջ ընթացքում արել են մոտ 180 հազար թեստ։
Իսկ Վրաստանում՝ 283 հազար PCR թեստ և 180 հազար ռապիդ թեստ։ Ընդ որում, այդ 283 հազար թեստից 54 հազարով ստուգել են երկիր մտնող բեռնատարների վարորդներին։ Որոնցից 788-ի մոտ վիրուսը հաստատվել է։
Ուղղակի մտածեք, որ հազարավոր վարակումներից կարող էինք խուսափել, եթե Հայաստանում ժամանակին արվեին թեստերն անհրաժեշտ քանակով։
Մի շատ կարևոր բան էլ 2 օր առաջ Factor.am-ն է պարզել։
Հունիսին «չճշտված հարուցիչով» թոքաբորբի դեպքերը 6,5 անգամ աճել են նախորդ տարվա հունիսի համեմատ։ Այս հունիսին այդպիսի թոքաբորբերի 3895 դեպք է գրանցվել, այսինքն անցյալ տարվա նույն ամսվա համեմատ + մոտ 3000 դեպք։
Իսկ սա՝ այն մասին, թե ինչպես է լինում, որ այդ մարդկանց չեն թեստավորել.
«Արսեն Թորոսյանն իր ասուլիսներից մեկում հայտնել էր, որ հնարավոր է լինեն այնպիսի դեպքեր, որ բժիշկներն ասեն՝ իմաստ չունի թեստավորել, քանի որ մարդն ակնհայտորեն վարակված է կորոնավիրուսով»:
Ըստ էության, Թորոսյանը նկարագրել է վարակվածների իրական թիվը կոծկելու մեխանիզմը. ասում է՝ «իմաստ չունի թեստավորել, քանի որ առանց թեստի էլ պարզ է, որ կորոնավիրուս է», բայց և միաժամանակ այդ մարդկանց կովիդով հիվանդների վիճակագրությունում չեն ներառում»։
