Փաշինյանը կապիտան Սանամյանին Ազգային հերոսի կոչման է ներկայացրել
ՀՀ վարչապետ Նիկոլ Փաշինյանը հայտնում է, որ այսօր ՀՀ նախագահին ուղղված չափազանց կարևոր միջնորդություն է ստորագրել և այդ առիթով հեռախոսազրույց ունեցել նախագահի հետ։
«Տավուշյան հաղթական մարտերի ակտիվ դերակատարներից 16 զինծառայողի ներկայացրել եմ «Մարտական խաչ» առաջին աստիճանի, 55 զինծառայողի՝ «Մարտական խաչ» երկրորդ աստիճանի շքանշանով պարգևատրման։ Իսկ կապիտան Ռուբեն Սանամյանին՝ Ազգային հերոսի կոչման՝ Հայրենիքի շքանշանով պարգևատրման։ Քիչ առաջ նաև Սանամյանի հետ հանդիպելու պատիվ ունեցա»,–Facebook սոցցանցի իր էջում գրել է Փաշինյանը։
Նրա խոսքով` սա գնահատանքի իրապես արժանի տուրք է տավուշյան հաղթական մարտերի բոլոր մասնակիցներին, Հայոց բանակի բոլոր զինվորներին, սպաներին, գեներալներին, ինչպես նաև հին ու նոր ժամանակների մեր բոլոր հերոսներին, մեր բոլոր նահատակներին, ովքեր իրենց օրինակով ոգեշնչեցին մեր նորօրյա հերոսներին, ում կողքին ապրելու պատիվն ենք վայելում այսօր։
Ի դեպ, Սանամյանը 2012-ին ՀՀ նախագահ Սերժ Սարգսյանի հրամանագրով պարգևատրվել էր «Մարտական խաչ» 2-րդ աստիճանի շքանշանով։ Իսկ 2016-ին սեպտեմբերի 25-ին Դիլիջանի քաղաքի օրվա տոնակատարության ժամանակ նրան շնորհվել էր «Երախտագիտության» մրցանակը։ Նա նաև «Մարշալ Բաղրամյան» մեդալով է պարգևատրվել, տեղեկացնում է Sputnik Armenia-ն։
