ՌԴ, ԱՄՆ և Ֆրանսիայի ԱԳՆ ղեկավարները կոչ են արել հրադադար հաստատել Արցախում
Ռուսաստանի, ԱՄՆ-ի և Ֆրանսիայի ԱԳՆ ղեկավարները համատեղ հայտարարություն են տարածել, որում կոչ են անում անհապաղ դադարեցնել կրակը Լեռնային Ղարաբաղում:
«Ռուսաստանի արտգործնախարար Սերգեյ Լավրովը, Ֆրանսիայի արտաքին գործերի նախարար Ժան-Իվ Լը Դրիանը և Միացյալ Նահանգների պետքարտուղար Մայք Պոմպեոն, որոնք ներկայացնում են ԵԱՀԿ Մինսկի խմբի համանախագահ երկրները, խստորեն դատապարտում են Ղարաբաղի հակամարտության գոտում և դրանից դուրս բռնության աննախադեպ և վտանգավոր սրումը», - ասված է հայտարարության մեջ:
«Նախարարները անվերապահորեն ընդգծում են, որ վերջին գրոհները, որոնք ենթադրաբար ուղղված են եղել քաղաքացիական թիրախների ուղղությամբ ինչպես շփման գծի երկայնքով, այնպես էլ Ադրբեջանի և Հայաստանի տարածքներում` Ղարաբաղյան հակամարտության գոտուց դուրս, և այդպիսի հարձակումների անհամաչափությունը տարածաշրջանում կայունության համար անընդունելի սպառնալիք են», - ասված է հայտարարության մեջ:
Անդրադառնալով երեք երկրների ղեկավարների ԵԱՀԿ Մինսկի խմբի համանախագահների հոկտեմբերի 1-ի հայտարարությանը, նախարարները «մեկ անգամ ևս կոչ են անում հակամարտության կողմերին անհապաղ և անվերապահորեն հրադադար հաստատել»:
Նախարարական հայտարարությունն արտահայտում է ԵԱՀԿ Մինսկի խմբի համանախագահող երկրների վճռական հանձնառությունը «Մինսկի խմբի անդամ երկրների աջակցությամբ ԵԱՀԿ-ի և միջազգային հանրության կողմից իրենց վստահված մանդատը լիարժեք իրականացնելու հարցում»:
«Համաձայն այս մանդատի, նրանք կշարունակեն հետևողականորեն աճեցնել փոխգործակցությունը կողմերի հետ՝ նրանց կոչ անելով անհապաղ պարտավորվել վերսկսել կարգավորման գործընթացը՝ հիմնվելով առկա հիմնական սկզբունքների և համապատասխան միջազգային փաստաթղթերի վրա, որոնք քաջ հայտնի են երկու կողմերին», - ասված է համատեղ հայտարարության մեջ, տեղեկացնում է Aysor.am-ը:
