Դավիթ Բաբայան. Վրաստանի պետականությունը կախված է Արցախի Պաշտպանության բանակի հաջողությունից

Արցախի նախագահի խորհրդական Դավիթ Բաբայանը հորդորեց չշտապել վրացական կողմի գործողությունների վերաբերյալ եզրակացություններ անել: Հիշեցնենք, որ վերջին շրջանում լրատվամիջոցներում շատ նյութեր են հայտնվել այն մասին, որ Վրաստանը նպաստում է Թուրքիայից Ադրբեջան զենքի տեղափոխմանը` միաժամանակ խոչընդոտելով բեռների տեղափոխմանը Հայաստան:

Ինչպես ընդգծեց Դավիթ Բաբայանը, պետք է ծայրաստիճան զգույշ լինել եզրակացությունների հետ կապված, և նախ անհրաժեշտ է հավաքել բոլոր ապացույցները` եզրակացություններում 100 տոկոսով համոզված լինելու համար:

«Մենք Վրաստանին և վրաց ժողովրդին բարեկամներ ենք համարում: Եթե ​​Հայաստանում պետականություն չլինի, Վրաստանում պետականությունը ամիսների, եթե ոչ ժամերի հարց է: Եթե ​​Վրաստանում ինչ-որ մեկը հավատում է, որ առանց Հայաստանի և Արցախի պետականության, թեկուզ` չճանաչված, կարող է Վրաստանի պետականություն լինել, ապա սխալվում է: Քանի որ Վրաստանը նույնպես ահաբեկիչների ու պանթուրքիզմի թիրախ կդառնա:

Ես ավելի քան համոզված եմ, որ վրաց ժողովուրդը դա շատ լավ հասկանում է: Ուստի մենք պայքարում ենք ամբողջ քաղաքակիրթ աշխարհի, այդ թվում` Վրաստանի համար: Եթե ​​մենք չկարողանանք կատարել մեր առաքելությունը, վտանգված է նաև Վրաստանի պետականությունը»,- հայտարարեց Դավիթ Բաբայանը, տեղեկացնում է News.am-ը։