ԱՄՆ-ի սենատորները կրկին կոչ են անում Թուրքիայի դեմ պատժամիջոցներ կիրառել՝ կապված С-400-ների ակտիվացման հետ

Ամերիկյան սենատորները Թրամփի վարչակազմին մղում են պատժամիջոցներ կիրառել Թուրքիայի դեմ՝ այն լուրերի ֆոնին, որ նա ամերիկյան կործանիչների վրա փորձարկում է ռուսական արտադրության հակահրթիռային պաշտպանության համակարգերը:

ԱՄՆ օրենսդիրները բազմիցս մտահոգություն են հայտնել Թուրքիայի կողմից ռուսական С-400 հակաօդային պաշտպանության համակարգեր գնելու կապակցությամբ և կոչ են արել պատժամիջոցներ կիրառել, ինչպես պահանջում է ԱՄՆ օրենսդրությունը, Ռուսաստանի պաշտպանական արդյունաբերության հետ գործարքներ իրականացնողների դեմ:

Վերջին հրահրումը հետևել է այն հաղորդագրություններին, որ Թուրքիան ռադարներ է ակտիվացրել՝ ամերիկյան F-16 կործանիչները հայտնաբերելու համար, և նախատեսում է հաջորդ շաբաթ С-400-ների համալիր փորձարկումներ իրականացնել:

«Մենք գրում ենք ի պատասխան այն տեղեկությունների, որ Թուրքիան ակտիվացրել է իր С-400 զենիթահրթիռային համակարգի ռադարները՝ հայտնաբերելու ԱՄՆ F-16 կործանիչները, որոնք վերադառնում են Eunomia-ի վարժանքներից, որոնք անցկացվել են Ֆրանսիայի, Իտալիայի, Հունաստանի և Կիպրոսի կողմից օգոստոսի վերջին՝ ի պատասխան Միջերկրական ծովի արևելքում Թուրքիայի չարդարացված ագրեսիայի»,- չորեքշաբթի պետքարտուղար Մայք Պոմպեոյին ուղղված նամակում գրել են սենատորներ Քրիս Վան Հոլլենը և Ջեյմս Լենքֆորդը:

«Հաշվի առնելով այս տեղեկատվությունը, մենք կրկին կոչ ենք անում ձեզ պատժամիջոցներ կիրառել Թուրքիայի դեմ, ինչպես պահանջում է օրենքը»,- հավելել են նրանք:

Նրանք նաև հարցրել են Պոմպեոյին, թե արդյոք Թուրքիան իսկապես ինտեգրե՞լ է համակարգը ՆԱՏՕ-ի մարտավարական տվյալների փոխանցման գիծ, և «արդյոք դա թույլ կտա՞ Ռուսաստանին տեղեկատվություն հավաքել ՆԱՏՕ-ի դաշնակիցների մասին»:

Ավելի վաղ Bloomberg-ը հայտնել էր, որ Թուրքիան նախատեսում է հաջորդ շաբաթ փորձարկել С-400-ը և ստուգել իր անձնակազմի պատրաստվածությունը Սև ծովի ափին գտնվող Սինոպ նահանգի ուսումնավարժական տարածքում:

«Այս ակտիվացման մասին զեկույցները հստակ ցույց են տալիս, որ Թուրքիան չի պատրաստվում փոխել ընթացքը և հրաժարվել համակարգից»,- գրել են Վան Հոլլենը և Լենքֆորդը: «Բացի այդ, դանդաղ տեմպը, որով պաշտպանության նախարարությունը փորձում է հանել Թուրքիային F-35-ի մատակարարման շղթայից, անկասկած, համարձակություն է տվել Թուրքիայի նախագահ Ռեջեփ Թայիփ Էրդողանին», տեղեկացնում է News.am-ը: