ՀՀ վարչապետ Նիկոլ Փաշինյանը հանձնարարել է իրավապահ մարմիններին ուսումնասիրություն կատարել գործարար Նարեկ Նալբանդյանի հետ կապված՝ հաշվի առնելով նաև մամուլում հայտնված տեղեկությունները, թե Նալբանդյանն իշխանությունների «սրտի օլիգարխն է»։ Նա այդ մասին հայտարարեց լրագրողների հետ ճեպազրույցում։
«Եթե Հայաստանի տնտեսական դաշտում կա մեկը, որ ինձ և մեր ընտանիքին նյարդայնացնում է արդեն տանելիության բոլոր սահմաններից դուրս, Նարեկ Նալբանդյանն է։ Ես հանձնարարել եմ, որ համապատասխան իրավապահ մարմինները վարույթներ նախաձեռնեն, և եթե մենք ստանանք որևէ ապացույց, որ որևէ գործարար, այդ թվում՝ Նարեկ Նալբանդյանը, փորձում է տպավորություններ ստեղծել, թե ինքը մեր ընտանիքի հետ որևէ կապ ունի, ես հավաստիացնում եմ՝ մեր արձագանքը կլինի շատ դաժան»,- ճեպազրույցի ժամանակ հայտարարեց Փաշինյանը։
Վարչապետը հայտարարեց, թե իրեն «ներվայնացնում է» այն հանգամանքը, որ Նարեկ Նալբանդյանն ինքը չի հերքում իր կապը Փաշինյանի ընտանիքի հետ։ Փաշինյանը զգուշացրեց բոլոր գործարարներին՝ ով կփորձի տպավորություն ստեղծել, թե իր ընտանիքի հետ կապ ունի, դաժան, անհամաչափ արձագանք է լինելու։
Նա պնդեց, որ իր ընտանիքը որևէ բիզնեսում չկա։
Sputnik Արմենիա
