«Ուժեղ Հայաստան» կուսակցության առաջնորդ Սամվել Կարապետյանը, որ տնային կալանքի տակ է, Հայաստանի երկրորդ նախագահ Ռոբերտ Քոչարյանին շնորհավորել է ծննդյան 72-ամյակի կապակցությամբ։
«Այսօր այս շնորհավորանքն առանձնահատուկ քաղաքական խորհուրդ ունի։ Ռոբերտ Քոչարյանի նկատմամբ քաղաքական ռեպրեսիվ գործընթացը վաղուց դուրս է իրավական վեճի շրջանակներից։ Նախագահը, որն իր պետական գործունեության տարիներին կանգնած է եղել Հայաստանի և Արցախի անվտանգության ու պետականության պաշտպանության առաջնագծում, այսօր զրկված է ազատությունից և ենթարկվում է քաղաքական հետապնդման»,– գրել է Կարապետյանը։
Նա նշել է, որ մարդիկ կարող են ունենալ տարբեր քաղաքական հայացքներ, տարբեր գնահատականներ և անգամ տարաձայնություններ։
«Միաժամանակ իրավական ու ժողովրդավարական պետությունում քաղաքական մրցակցությունը չպետք է վերածվի քաղաքական հաշվեհարդարի։ Հայաստանի ապագան չի կարող կառուցվել քաղաքական հակառակորդների կամ այլախոհների նկատմամբ հետապնդումների ու ազատազրկումների միջոցով։ Ատելության, վրեժխնդրության ու պառակտման ներպետական քաղաքականությունը չի կարող իրական հավելյալ արժեք ստեղծել, իսկ Հայաստանի առջև առկա մարտահրավերները պահանջում են ճիշտ հակառակը»,– հավելել է Կարապետյանը։
Նա Ռոբերտ Քոչարյանին և նրա ընտանիքին մաղթել է առողջություն, ուժ և տոկունություն այս դժվարությունը ևս հաղթահարելու համար։
Նշենք, որ այսօր Ռոբերտ Քոչարյանին շնորհավորել է նաև ՌԴ նախագահ Վլադիմիր Պուտինը։
Sputnik Արմենիա
