Последние новости
2019-08-21 14:55

Լիլիթ Սահակյան․ Գրոմովյան արշավախումբն Ամուլսարում ուրան էր փնտրում, ոչ թե ոսկի

0
Telegram

Խորհրդային շրջանում Ամուլսարում ոսկու պաշարների գնահատում չի իրականացվել: Այս մասին NEWS.am-ի հետ զրույցում ասաց ԳԱԱ երկրաբանության ինստիտուտի տնօրենի գիտական գծով տեղակալ, գիտաշխատող Լիլիթ Սահակյանը:

Նա նշեց, որ ոսկու առկայության մասին առաջին տվյալները հայտնի դարձան երկրաբանա-հետախուզական աշխատանքների արդյունքում, որոնք անցկացվել էին 2008-2011 թվականներին «Լիդիան» ընկերության կողմից:

Փոխտնօրենի խոսքով՝ խորհրդային շրջանում Գրոմովյան արշավախումբը 1952-1954 թվականներին Ամուլսարի ապարներում ուրանի պարունակությունների ուսումնասիրություններ է իրականացրել: Սակայն հետախուզության արդյունքում մասնագետները եկել են այն եզրակացության, որ ուրանի պաշարներն աննշան են և արդյունահանման տեսանկյունից հետաքրքրություն չեն ներկայացնում: Այդ ուղղությամբ աշխատանքները դադարեցվել են: Սակայն պահպանվել են հաշվետվությունը և քարտեզները:

Շարունակական ուսումնասիրությունների արդյունքում Ամուլսարում ոսկու պարունակության մասին «Լիդիանի» կողմից ներկայացված սկզբնական տվյալները տարիների ընթացքում փոխվել են. ոսկու ավելի մեծ պաշարներ են ակնկալում, քան սկզբում ենթադրվում էր:

Լիլիթ Սահակյանի խոսքով, ըստ էության, հանքային և թերմալ ջրերի անմիջական հարևանությամբ պայթունատեխնիկական աշխատանքների անցկացումը հնարավոր է, սակայն, դրանք պետք է կատարվեն ճշգրիտ հաշվարկով՝ հաշվի առնելով բոլոր գործոնները՝ ապարների տեսակները, պայթուցիկների լիցքի զանգվածը, հեռավորությունը լիցքի կետից և այլն, ինչպես նաև դրա հետևանքները՝ վիբրացիան և աղմուկը, ինչն էլ ուսումնասիրվել է ընկերության կողմից:

«Բնությունը անկանխատեսելի է, և ամեն ինչ հնարավոր է: Անգամ հայտնի է, որ ուժեղ երկրաշարժերից հետո աղբյուրները կարող են անհետանալ, նորերը առաջանալ»,- ասաց Սահակյանը:

Ապարների թթվային դրենաժի հետևանքները նվազագույնի հասցնելու համար նույնպես առավելագույնս ճշգրիտ հաշվարկ և կառավարման ճիշտ մեթոդներ են անհրաժեշտ կիրառել: Օրինակ՝ հաշվարկներն իրականացվում են՝ ելնելով ապարների պետրոգրաֆիական կազմից: Սովորաբար ոսկու հանքաշերտերում կան պիրիտ և խալկոպիրիտ սուլֆիդային միներալները, որոնք ջրի և օդի հետ փոխազդեցության դեպքում առավել ուժեղ են թթվային դրենաժ առաջացնում:

Սակայն «Լիդիանի» հետազոտությունների տվյալներով՝ Ամուլսարի ապարները պիրիտ և խալկոպիրիտ քիչ են պարունակում, սակայն գերակշռում են ալունիտ ու յարոզիտ միներալները: Այս միներալների վարքագիծը թթվային դրենաժի առաջացման առումով քիչ է ուսումնասիրված և պետք է իրականացվի «Լիդիան» ընկերության կողմից, երկարաժամկետ լաբորատոր փորձարկումների միջոցով:

««Լիդիան» ընկերությունը նախատեսում է նմանատիպ ուսումնասիրություններ»,- նշեց Լիլիթ Սահակյանը՝ հավելելով, որ թթվային դրենաժի հետևանքների նվազեցման տեսանկյունից Ամուլսարի կլիմայական պայմանները նույնպես բարենպաստ են՝ որքան ցուրտ, այնքան խաթարվելու է ինտենսիվ թթվագոյացման պրոցեսը:

 «Մի բան ակնհայտ է, որ ընկերությունը նոր մշակույթ բերեց Հայաստանի հանքարդյունաբերության մեջ, հատկապես բնապահպանական խնդիրների կառավարման ասպարեզում: Իրենց կատարած ուսումնասիրությունները շատ բարձր մակարդակով են արված: Իհարկե, ոչ մեկս չի ցանկանում, որ բնության բնականոն գործընթացները խաթարվեն, բայց եթե պետության զարգացմանը, հատկապես ռազմական առումով հզորացմանը նպաստելու է հանքավայի շահագործումը, ակնհայտ է, որ հանքավայրը պետք է շահագործվի»,- կարծիք հայտնեց ինստիտուտի փոխտնօրենը:

Основная тема:
Ամուլսար

Теги:
Ամուլսար

ПОСЛЕДНИЕ ОТ АВТОРА

ПОСЛЕДНЕЕ ПО ТЕМЕ

  • ՆԻԿՈԼԸ ՈՒԺ ԿԿԻՐԱՌԻ՞
    2019-09-17 21:45

    Հյուսիսային պողոտա, Իջևան, Ամուլսա՞ր Ամուլսարի մատույցներում տեղադրված բոլոր չորս պահակետերում փակցրած են շուրջօրյա հերթապահությունների գրաֆիկները։ Հերթապահում են ոչ միայն Ջերմուկի բնակիչները և բնապահպանները. ցուցակներում շատ են հասարակական գործիչների և քաղաքացիական նախաձեռնությունների ակտիվիստների ծանոթ ազգանունները։ Հերթապահությունը, հիշեցնեմ, ձգվում է մեկ տարուց ավելի. առավել քան մեկ տարի «Լիդիան» ընկերության աշխատակիցներին և շինարարական տեխնիկան թույլ չեն տալիս մտնել ենթադրվող հանքի տարածք, մարդիկ բազմիցս պառկել են էքսկավատորների առաջ։ Շատերը պահակետերից չեն հեռանում օրեր շարունակ։

  • Շիրակ Բունիաթյան. Ամուլսարը մեր հայրենիքն է, և վերջ
    2019-09-09 14:15

    Ամուլսարի մուտքերը կբացվի երկու դեպքում։ Այս մասին facebook-ի իր էջում գրել է բնապահպան Շիրակ Բունիաթյանը:

  • Ծառուկյանը՝ Ամուլսարի հանքի շահագորման մասին
    2019-09-09 14:12

    Ամուլսարի շահագործման հարցում պետք է հաշվի առնվի ժողովրդի կարծիքը, եթե կլինի ժողովրդի համաձայնությունը, կբացեն, եթե չի լինի, թող չբացեն: Այս մասին, այսօր՝ սեպտեմբերի 9-ին, ԱԺ-ում լրագրողների հետ զրույցում նշեց ԲՀԿ խմբակցության ղեկավար Գագիկ Ծառուկյանը:

  • Փաշինյան. Ամուլսարի հանքի շահագործումն արգելելու որևէ իրավական հիմնավորում չունենք
    2019-09-09 12:27

    Առնվազն այս պահի դրությամբ մենք չունենք Ամուլսարի հանքի շահագործումն արգելելու որևէ իրավական հիմնավորում։ Բայց հասկանալի է նաև, որ մենք չենք կարող հաշվի չառնել մեր հանրության շրջանում առկա անհանգստությունները, ֆեյսբուքի ուղիղ եթերի քիչ առաջ ասաց ՀՀ վարչապետ Նիկոլ Փաշինյանը։