Գնդապետ Սամվել Գրիգորյանի նշանակումը 3-րդ բանակային կորպուսի հրամանատարի պաշտոնում Պաշտպանության նախարարությունում քննարկումների առիթ է դարձել, գրել է «Հրապարակ» թերթը՝ հղում անելով իր աղբյուրներին։
Պարբերականը հիշեցրել է, որ Գրիգորյանը 2023 թվականին տեղափոխվել է Հայաստան և աշխատանքի անցել ՊՆ-ում, սակայն ավելի քան երեք տարի նրան վարչության պետի տեղակալի պաշտոնից ավելի բարձր պաշտոն չի առաջարկվել։ Թերթի պնդմամբ՝ դա կարող է կապված լինել այն հանգամանքի հետ, որ Գրիգորյանը չի համարվել գործող իշխանություններին լոյալ զինվորական։
Ըստ թերթի՝ Գրիգորյանի նշանակումը տեղի է ունեցել Զինված ուժերում առկա կադրային խնդիրների պայմաններում։ Պարբերականի աղբյուրների պնդմամբ՝ ՊՆ ղեկավարությունը փորձում է համակարգ վերադարձնել նաև արցախցի այն սպաներին, որոնց նախկինում ծառայությունը շարունակելու հնարավորություն չէր տրվել։
Գրիգորյանը Արցախում զբաղեցրել է մի շարք բարձր զինվորական պաշտոններ՝ զորամասի հրամանատարից մինչև դիվիզիայի հրամանատարի տեղակալ։ 2020 թվականի պատերազմից հետո նա եղել է Պաշտպանության բանակի շտաբի պետը։
Գրիգորյանը 3-րդ բանակային կորպուսի հրամանատար էր նշանակվել օգոստոսի 31-ին։ Հուլիսի սկզբից այդ պաշտոնը թափուր էր, իսկ մինչ այդ կորպուսի հրամանատարն էր գեներալ-մայոր Սիմոն Նազարյանը։
Armenia Today
