Ռոբերտ Քոչարյանի և Արմեն Գևորգյանի գործով դատական նիստը հետաձգվեց

Հայաստանի երկրորդ նախագահ Ռոբերտ Քոչարյանի և նախկին փոխվարչապետ Արմեն Գևորգյանի գործով դատական նիստը հետաձգվեց:

Միջնորդությունը ներկայացրեց Գևորգյանի փաստաբան Էրիկ Ալեքսանյանը: Նա խնդրեց նիստը հետաձգել՝ հաշվի առնելով առողջական վիճակի պատճառով իր պաշտպանյալի բացակայությունը: Փաստաբանը հայտնեց, որ միջնորդությունը ուղարկել է նաև դատախազություն: Ալեքսանյանը խնդրեց հաջորդ հանդիպումը նշանակել մայիսի 25-ից ոչ շուտ՝ կապված այն բանի հետ, որ Գևորգյանը ամբուլատոր բուժում է անցնում: Փաստաբանը նաև համապատասխան բժշկական տեղեկանքներ ներկայացրեց:

Ռոբերտ Քոչարյանի փաստաբան Արամ Վարդևանյանը հայտնեց, որ իր պաշտպանյալը մտադիր է մասնակցել արտահերթ խորհրդարանական ընտրություններին, իսկ օրենսդրությունը մասնակիցների համար հավասար իրավունքներ է ենթադրում: Այս կապակցությամբ փաստաբանը խնդրեց նիստը հետաձգել նույնիսկ ավելի ուշ ժամկետով` առնվազն հունիսի 19-ին, որպեսզի գործընթացը չխանգարի նախընտրական արշավին մասնակցությանը:

Դատախազ Պետրոս Պետրոսյանը առարկություններ չուներ Էրիկ Ալեքսանյանի միջնորդության վերաբերյալ, սակայն նա բազմաթիվ առարկություններ ուներ Արամ Վարդևանյանի միջնորդության դեմ: Դատախազի կարծիքով՝ այն հիմնավորված չէ։

Վարդևանյանը հիշեցրեց, որ եղել է դեպք, երբ դատարանը բաց է թողել 10 նիստ, և դատախազությանը դա չի անհանգստացրել: «Ես ձեզ խնդրում եմ երեք նիստ տեղափոխել»,- ասաց փաստաբանը:

Դատավոր Աննա Դանիբեկյանը հայտնեց, որ հաջորդ շաբաթ ինքը մասնակցելու է դատավորների վերապատրաստման դասընթացների, ուստի նիստը հետաձգվում է: Միևնույն ժամանակ, նա հայտարարեց, որ Արամ Վարդևանյանը չի ներկայացրել միջնորդության հիմնավորված ապացույցներ: Հաջորդ նիստը նշանակված է մայիսի 25-ին, ժամը 13:00-ին, տեղեկացնում է News.am-ը: