Տիրան ԼՈՔՄԱԳՅՈԶՅԱՆ․ ԹՈՒՐՔԻԱՆ ՀԱՅԱՍՏԱՆԻ ՀԱՄԱՐ ՈՐԵՎԷ ԴՐԱԿԱՆ ԱԶԴԱԿ ՉԻ ՏԱԼԻՍ
Երեկ կառավարության նիստին Նիկոլ Փաշինյանը հայտարարել էր, թե տարածաշրջանային խաղաղության թեմայով որոշակի հրապարակային դրական ազդակներ կան Թուրքիայի կողմից, և «մենք այդ ազդակները կգնահատենք և դրական ազդակներին դրական ազդակներով կպատասխանենք»։
168․am-ի հետ զրույցում թուրքագետ Տիրան Լոքմագյոզյանն, անդրադառնալով այդ հայտարարությանը, ասել է՝ եթե Նիկոլ Փաշինյանը խոսում է Թուրքիայից եկող դրական ազդակներից, ապա պետք է մանրամասնի՝ ինչի մասին է խոսքը, որ ինքը տեսել ու լսել է։
«Թուրքիայի կողմից որևէ դրական ազդակ չկա, իհարկե, նայած, թե որ կողմից ենք դիտարկում։ Եթե Ադրբեջանի կողմից նայենք, ապա Թուրքիան շատ դրական ազդակներ է տալիս, իսկ Հայաստանի համար որևէ դրական ազդակ չեմ տեսել, հակառակը՝ եղել են հակահայկական ազդակներ։ Եթե Նիկոլ Փաշինյանը վերջին օրերին հայկական գյուղերն անգամ իրենց անվանումներով չի կոչում, այլ ադրբեջանական, ապա հայտնի է դառնում, թե նա ո՛ւմ համար է աշխատում և ո՛ր երկրի վարչապետն է։ Այստեղից արդեն պարզ է դառնում, թե Փաշինյանի ասած դրական ազդակներն ում համար են դրական», - նշել է Տիրան Լոքմագյոզյանը։
