Ընթանում է Ռոբերտ Քոչարյանի և Արմեն Գևորգյանի գործով դատավարությունը

Երևան քաղաքի Շենգավիթ վարչական շրջանի ընդհանուր իրավասության դատարանում կշարունակվի ՀՀ երկրորդ նախագահ Ռոբերտ Քոչարյանի և նախկին փոխվարչապետ, այժմ պատգամավոր Արմեն Գևորգյանի գործով դատավարությունը:

Ինչպես հաղորդվել էր, նախորդ նիստին նախկին փոխվարչապետ, պատգամավոր Արմեն Գևորգյանի փաստաբան Լուսինե Սահակյանը լքեց նիստերի դահլիճը՝ որպես բողոքի նշան դատավորի գործողությունների դեմ: Երբ դատավոր Աննա Դանիբեկյանը մերժեց պաշտպանի երկու միջնորդությունները, Լուսինե Սահակյանը մեկ անգամ ևս հայտարարեց, որ գործի բազմաթիվ հատորներից ստացել է ընդամենը մի քանի փաստաթուղթ: 128 հատորին ծանոթանալու համար փաստաբանին տրվեց մի քանի օր: Գործընթացին Սահակյանի մասնակցության պահից դատավոր Դանիբեկյանը փաստացի փաստաբանին զրկում է գործի նյութերին ծանոթանալու հնարավորությունից: Ընդ որում, ըստ դատավորի, քանի որ փաստաբանը դրանք երբեք փոստով չի ստացել, նա կարող է դա անել դատարանում: Ի նշան բողոքի՝ փաստաբանը լքեց նիստերի դահլիճը՝ հայտարարելով, որ հեռանում է, քանի դեռ դատարանը նրան չի տրամադրել բոլոր անհրաժեշտ փաստաթղթերը, տեղեկացնում է News.am-ը:

Հիշեցնենք, որ ավելի վաղ Աննա Դանիբեկյանի սուբյեկտիվ վերաբերմունքի պատճառով դատավարությունը լքել էր Արմեն Գևորգյանի պաշտպան Էրիկ Ալեքսանյանը: Արմեն Գևորգյանը ևս դատարանին մեղադրել էր կողմնակալության մեջ: